ആഘോഷപ്പെരുന്നാൾ

ദോഹ: കോവിഡാനന്തരമെത്തിയ പെരുന്നാളിനെ ആഘോഷമാക്കി മാറ്റി ​ഖത്തറിലെ സ്വദേശികളും പ്രവാസികളും. ​വ്രതവിശുദ്ധിയുടെ 30 ദിനങ്ങൾ പൂർത്തിയാക്കി തിങ്കളാഴ്ച ​ഗൾഫ്​ നാടുകളിലെ ​വിശ്വാസികൾക്കൊപ്പം പെരുന്നാളിനെ വരവേറ്റ ഖത്തറിന് ഇനി ആഘോഷങ്ങളുടെ കാലമാണ്​. രാവിലെ 5.12ന്​ നടന്ന നമസ്കാരങ്ങളോടെയായിരുന്നു തുടക്കം. പള്ളികളും ഈദ്​ഗാഹുകളുമായി 520 സ്​ഥലങ്ങളിൽ പെരുന്നാൾ നമസ്കാരത്തിനായി ജനം ഒഴുകിയെത്തി. രണ്ടു വർഷക്കാലം കോവിഡിന്‍റെ നിയന്ത്രണങ്ങളിൽ സാമൂഹിക അകലം പാലിച്ചും ആരോഗ്യ സുരക്ഷാ മുൻകരുതലുകൾ കണിശമായി പാലിച്ചുമായിരുന്നു ഈദ്​ എങ്കിൽ ഇത്തവണ സ്ത്രീകളും കുട്ടികളുമായി എല്ലാ വിഭാഗം ജനങ്ങളും ആഘോഷത്തോടെ തന്നെ പള്ളിയിലേക്ക്​ പുറപ്പെട്ടു.

അതിരാവിലെ നമസ്കാര സ്ഥലങ്ങളിൽ ഇടം പിടിച്ചവർ, തക്​ബീറുകൾ മുഴക്കി പെരുന്നാളിനെ വരവേറ്റു. എല്ലായിടങ്ങളിലും 5.12നായിരുന്നു നമസ്കാരം. തുടർന്ന്​ ഹ്രസ്വമായ പ്രഭാഷണത്തിൽ ​റമദാനിലെ വ്രതവിശുദ്ധിയുടെ മഹത്വവും, ആഘോഷങ്ങളുടെ സന്ദേശവും ഖതീബുമാർ ഉദ്​ബോധിപ്പിച്ചു.

ലോകമുസ്​ലികളുടെ ഐക്യത്തിന്​ ആഹ്വാനം ചെയ്തും നന്മകൾക്കായി പ്രാർഥിച്ചും പ്രഭാഷണം നിർവഹിച്ചു.

കോവിഡ്​ ഭീത അകന്ന്​, ആരോഗ്യ സുരക്ഷ കൈവരിച്ച സാഹചര്യത്തിൽ കൂടുതൽ സ്​നേഹവും സൗഹാർദവും പങ്കുവെക്കാനായിരുന്നു നമസ്കാര ശേഷം വിശ്വാസികൾ സമയം കണ്ടെത്തിയത്​. പരസ്പരം ആശ്ലേഷിച്ചും സലാം ചൊല്ലിയും അഭിവാദ്യം ചെയ്തുമെല്ലാം അവർ മഹാമാരിക്ക്​ മുമ്പത്തെ ആഘോഷപ്പൊലിമയിലേക്ക്​ തിരിച്ചെത്തി.

കഴിഞ്ഞ രണ്ടു വർഷമായി നഷ്ടമായ ആഘോഷങ്ങൾ തിരിച്ചെത്തിയതിന്‍റെ സന്തോഷം പങ്കുവെച്ചാണ്​ കോഴിക്കോട്​ സ്വദേശിയായ ജംഷീദ്​ പെരുന്നാളി​നെ കുറിച്ച്​ സംസാരിച്ചത്​. 'ഒരു തവണ ​​ക്വാറന്‍റീനിലായതിനാൽ പെരുന്നാൾ തന്നെ ഇല്ലാതായി. അടുത്ത തവണ നമസ്കാരം നിർവഹിച്ചെങ്കിലും, കൂട്ടുകാരെ കാണാനും ആഘോഷിക്കാനും കഴിഞ്ഞുമില്ല. എന്നാൽ, ഇക്കുറി അതിന്‍റെ എല്ലാ നഷ്ടങ്ങളും മായ്ക്കുന്നതായിരുന്നു പെരുന്നാൾ. ഈദ്​ ഗാഹിനായി നേരത്തെ തന്നെ അൽ അറബി സ്​പോർട്​സ്​ സ്​റ്റേഡിയത്തിൽ നമസ്കാര ശേഷം സുഹൃത്തുക്കളെയും ബന്ധുക്കളെയുമെല്ലാം കാണാനും സൗഹൃദവും സ്​നേഹവും പങ്കുവെക്കാനും കഴിഞ്ഞു. എല്ലാവരും ഒന്നിച്ച്​ ഫോട്ടോയെടുത്താണ്​ പിരിഞ്ഞത്​' -​ദോഹ ഹിലാലിൽ താമസക്കാരനായ അദ്ദേഹം പറഞ്ഞു.

കാലാവസ്ഥ അനുകൂലമായിരുന്നുവെന്നും, ഈദ്​ ഗാഹിലെത്തിയതോടെ പെരുന്നാളിന്‍റെ ആ പഴയ ആഘോഷം പൂർണമായും അനുഭവിക്കാനായെന്നും വക്​റയിൽ താമസിക്കുന്ന അബ്ദുൽ ഗഫൂർ പറഞ്ഞു.

'2020ലെ ചെറിയ പെരുന്നാളിന്​ റൂമിലായിരുന്നു നമസ്കാരം. കഴിഞ്ഞ തവണ നാട്ടിലായിരുന്നു. ഇത്തവണ സന്ദർശനത്തിനെത്തിയ കുടുംബത്തിനൊപ്പമാണ്​ പള്ളിയിൽ പെരുന്നാൾ നമസ്കാരത്തിൽ പ​ങ്കെടുത്തത്​. കൂട്ടുകാരെയും നാട്ടുകാരെയുമെല്ലാം കണ്ടു സന്തോഷം പങ്കിട്ടു.

വൈകുന്നേരം റൗദത്തുൽ ഖൈൽ പാർക്കി​ൽ മണിക്കൂറുകളോളം ചിലവഴിക്കുകയും രാത്രിയിൽ കതാറിയിലെ പെരുന്നാൾ ആഘോഷത്തിൽ പ​ങ്കെടുക്കുകയും ചെയ്തു. വരും ദിനങ്ങളിൽ ദോഹ കോർണിഷിലും പോകാനുള്ള ഒരുക്കത്തിലാണ്​' -​ദോഹ നജ്​മയിൽ താമസിക്കുന്ന മുഹമ്മദ്​ സിദ്ദീഖ്​ മാഹി പറയുന്നു.

ഖത്തറിലെത്തിയ ശേഷം വലിയ ആഗ്രഹമായിരുന്നു ഇമാം മുഹമ്മദ്​ ബിൻ അബ്​ദുൽ വഹാബ്​ ഗ്രാൻഡ്​ മസ്​ജിദ്​ സന്ദർശിക്കുകയെന്നത്​. കഴിഞ്ഞ രണ്ടു വർഷങ്ങളിലും കോവിഡ്​ കാരണം പെരുന്നാളിന്​ പള്ളിയിൽ പോകാൻ കഴിഞ്ഞില്ല. ഇത്തവണ പെരുന്നാളിന്​ അതിരാവിലെ തന്നെ ഇവിടെയെത്തി കുട്ടികൾക്കൊപ്പം നമസ്കാരം നിർവഹിക്കാൻ കഴിഞ്ഞു. മിഠായിയും പെരുന്നാൾ സമ്മാനങ്ങളും ലഭിച്ചത്​ കുട്ടികൾക്കും സന്തോഷമായി. -​ മതാർഖദീമിൽ താമസിക്കുന്ന കോഴിക്കോട്​ സ്വദേശിനി റാഷിദ സിദ്ദീഖ്​ പറയുന്നു.

പെരുന്നാൾ നമസ്കാരത്തിനു ശേഷം, ബന്ധുക്കളെയും സുഹൃത്തുക്കളെയും സന്ദർശിച്ചും, വൈകുന്നേരങ്ങളിൽ രാജ്യത്തിന്‍റെ വിവിധ ഭാഗങ്ങളിലായി പാർക്കുകളിലും മാളുകളിലും ചിലവഴിച്ചും, ബീച്ചുകളിലെത്തിയുമെല്ലാമായിരുന്നു പ്രവാസികൾ ഉൾപ്പെടെയുള്ളവരുടെ പെരുന്നാൾ ആഘോഷം.