ദോഹ ചർച്ച: വിഷയമാകാതെ അഫ്​ഗാൻ വെടിനിർത്തൽ

ദോഹ: അഫ്​ഗാനിസ്​താനിൽ സമാധാനം പുനഃസ്ഥാപിക്കാൻ ഖത്തറിൻെറ മധ്യസ്ഥതയിൽ ദോഹയിൽ നടക്കുന്ന താലിബാൻ-അഫ്​ഗാൻ സർക്കാർ ചർച്ചയിൽ പുരോഗതിയില്ല. അഫ്​ഗാനിലെ വെടിനിർത്തലാണ്​ പ്രധാന കാര്യമെങ്കിലും ആ ഘട്ടത്തിലേക്ക്​ ചർച്ചകൾ ഇതുവരെ എത്തിയിട്ടില്ലെന്ന്​ ഖത്തറിലെ താലിബാൻ പൊളിറ്റിക്കൽ ഓഫിസ്​ വക്താവ്​ ഡോ. മുഹമ്മദ്​ നഈം പറഞ്ഞു. അഫ്​ഗാനിൽ അക്രമസംഭവങ്ങൾ തുടരുകയാണ്​. ഇരുകക്ഷികളും വെടിനിർത്തൽ ചർച്ച ചെയ്യുന്ന ഘട്ടത്തിൽ എത്തിയിട്ടില്ല. നടപടിക്രമങ്ങൾ മാത്രമാണ്​ ഇപ്പോഴത്തെ വിഷയമെന്നും 'ഗൾഫ്​ ടൈംസ്​' ദിനപത്രവുമായുള്ള അഭിമുഖത്തിൽ അദ്ദേഹം പറഞ്ഞു.

ഒരു മാസത്തിലധികമായി ദോഹയിൽ ചർച്ചകൾ നടക്കുകയാണ്​. വെടിനിർത്തലിനുള്ള തടസ്സങ്ങൾ എന്താണെന്ന​ ചോദ്യത്തിന്​ അത്തരം ഘട്ടത്തിലേക്ക്​ എത്തിയിട്ടില്ലെന്നായിരുന്നു മറുപടി. തടസ്സങ്ങൾ വരാൻ സാധ്യതയുള്ള സു​പ്രധാന വിഷയങ്ങളിലേക്ക്​ വന്നിട്ടില്ല. എന്നാലും പ്രതീക്ഷയുണ്ട്​.സമയപരിധി നൽകാൻ കഴിയില്ലെങ്കിലും ചർച്ചയിൽ പുരോഗതി ഉണ്ടാകുമെന്നാണ്​ പ്രതീക്ഷയെന്നും അദ്ദേഹം പറഞ്ഞു.

കഴിഞ്ഞ ഫെബ്രുവരിയിൽ താലിബാനും യു.എസും ദോഹയിൽ ഒപ്പുവെച്ച സമാധാന കരാറിൻെറ അടിസ്ഥാനത്തിലാണ്​ നിലവിലുള്ള ചർച്ചകൾ. യു.എസുമായുള്ള കരാർ ചരിത്രപ്രധാനമാണ്​. അതിൻെറ തുടർച്ചയാണ്​ ഇപ്പോൾ നടക്കുന്നതെന്നും താലിബാൻ വക്താവ്​ പറഞ്ഞു. തങ്ങൾക്ക്​ അനുരഞ്ജനത്തിനും സമാധാനത്തിനും ആത്മാർഥതയുണ്ട്​. അതിനാലാണ്​ 18 മാസം നീണ്ട ചർച്ചകൾക്കൊടുവിൽ യു.എസുമായി കരാറിൽ ഏർപ്പെട്ടത്​. സമാധാനം കൊണ്ടുവരാൻ തങ്ങൾക്ക്​ എന്തെല്ലാം ചെയ്യാൻ കഴിയുമോ അതൊക്കെ ചെയ്യും.

ഇസ്​ലാമിക ശരീഅത്ത്​, സ്​ത്രീകളുടെ അവകാശം, അഫ്​ഗാനിലെ ഭാവി രാഷ്​ട്രീയ കരാറുകൾ തുടങ്ങിയ വിഷയങ്ങൾ ദോഹ ചർച്ചയിൽ വരുംദിവസങ്ങളിൽ വരുമോ എന്ന്​ പറയാൻ കഴിയില്ല. ആരോഗ്യം, വിദ്യാഭ്യാസം, ജോലി തുടങ്ങിയ ഇസ്​ലാമിൽ പറഞ്ഞിരിക്കുന്ന എല്ലാ അവകാശങ്ങളും സ്​ത്രീകൾക്ക്​ കിട്ടണം. മറ്റുള്ള രാജ്യങ്ങളുടെ കാര്യങ്ങളിൽ ഇടപെടരുത്​ എന്നതാണ്​ താലിബാൻെറ നയം. മറ്റുരാജ്യങ്ങൾ അഫ്​ഗാൻെറ കാര്യത്തിലും ഇടപെടരുത്​. യു.എസ്​ –താലിബാൻ കരാർ അമേരിക്കൻ തെരഞ്ഞെടുപ്പ്​ ഫല​െത്ത സ്വാധീനിക്കില്ല. ഏതെങ്കിലും വ്യക്തിയുമായല്ല കരാർ ഒപ്പിട്ടത്​. യു.എസ്​ സർക്കാറുമായാണ്​.

അഫ്​ഗാനിൽനിന്ന്​ യു.എസ്​ പിന്മാറുമെന്നുതന്നെയാണ്​ തങ്ങൾ കരുതുന്നത്​.അമേരിക്കക്കുവേണ്ടിയും അമേരിക്കൻ ജനതക്കുവേണ്ടിയുമാണ്​ യു.എസ്​ കരാറിൽ ഒപ്പിട്ടത്​. എല്ലാ യു.എസ്​ രാഷ്​ട്രീയ നേതാക്കളും ഇതിൻെറ പ്രാധാന്യം മനസ്സിലാക്കുമെന്നും അതിൽ മാറ്റമുണ്ടാവില്ലെന്നും താലിബാൻ പ്രതീക്ഷിക്കുന്നു.ചർച്ചകൾക്കുള്ള വേദിയൊരുക്കിയതിനും സമാധാന ചർച്ചകൾക്ക്​ മധ്യസ്ഥത വഹിക്കുന്നതിനും ഖത്തറിന്​ താലിബാൻ വക്താവ്​ നന്ദി അറിയിച്ചു.