വീണ്ടും ശക്​തമായ മഴയും മിന്നലും; വരുംദിവസങ്ങളിലും തുടരും

ദോഹ: ഏതാനും ദിവസങ്ങളുടെ ഇടവേളക്ക്​ ശേഷം രാജ്യത്ത്​ ശക്​തമായ മഴയും കാറ്റും മിന്നലും. ശനിയാഴ്​ച ഉച്ചയോടെയാണ്​ മിക്കവാറും എല്ലാ ഭാഗങ്ങളിലും മഴ ലഭിച്ചത്​. ശക്​തമായ ഇടിമിന്നലും അനുഭവപ്പെട്ടു. കനത്ത മഴയിൽ താഴ​്ന്ന പ്രദേശങ്ങളിൽ വെള്ളം പൊങ്ങുകയും ചെയ്​തു. റോഡുകളിലും വെള്ളം കെട്ടിയതോടെ ഗതാഗതം സാവധാനത്തിലായി. ചില ഭാഗങ്ങളിൽ ഗതാഗത കുരുക്കും അനുഭവപ്പെട്ടു. രാജ്യത്തി​​​െൻറ വടക്കൻ ഭാഗങ്ങളിലാണ്​ ശക്​തമായ മഴ അനുഭവപ്പെട്ടു. ദോഹ, വക്​റ ഭാഗങ്ങളിൽ നല്ല മഴയുണ്ടായിരുന്നു. ഖത്തർ മീറ്ററോളജിക്കൽ ഡിപ്പാർട്ട്​മ​​െൻറ്​ വെള്ളിയാഴ്​ച തന്നെ ശക്​തമായ മഴ പ്രവചിച്ചിരുന്നു. കനത്ത മഴക്കുള്ള സാധ്യത കണക്കിലെടുത്ത്​ അധികൃതർ കരുതൽ നടപടികളും സ്വീകരിച്ചിരുന്നു. അതേസമയം, വരും ദിവസങ്ങളിലും ശക്​തമായ മഴ​ക്ക്​ സാധ്യതയുണ്ടെന്നാണ്​ പ്രവചനം. ഞായർ, തിങ്കൾ ദിവസങ്ങളിൽ വിവിധ ഭാഗങ്ങളിൽ മഴ ലഭിച്ചേക്കാം. കാലാവസ്ഥ മേഘാവൃതമാകുകയും ഇടിമിന്നലോടെ മഴയുണ്ടാകുമെന്നുമാണ്​ കാലാവസ്ഥ നിരീക്ഷണ കേന്ദ്രം അറിയിച്ചത്​.

40 നോട്ട്​ വേഗതയിൽ കാറ്റുവീശാനും സാധ്യതയുണ്ട്​. കടൽ പ്രക്ഷുബ്​ധമായിരിക്കും. ഇൗ സാഹചര്യത്തിൽ കടലിലും തീരത്തും വിനോദത്തിന്​ അടക്കം പോകുന്നത്​ ഒഴിവാക്കണമെന്ന്​ നിർദേശിച്ചിട്ടുണ്ട്​. ശക്​തമായ മഴ തുടരുന്ന സാഹചര്യത്തിൽ വെള്ളക്കെട്ട്​ ഒഴിവാക്ക​​ുന്നതിനുള്ള നടപടിക്രമങ്ങളെല്ലാം സ്വീകരിച്ചിട്ടുണ്ടെന്ന്​ മുനിസിപ്പാലിറ്റി, പരിസ്ഥിതി മന്ത്രാലയത്തിലെ റെയിൻഫാൾ എമർജൻസി കമ്മിറ്റി അറിയിച്ചു. മഴ സംബന്ധിച്ച എല്ലാ റിപ്പോർട്ടുകളും വിളികളും മുനിസിപ്പൽ ഒാപറേഷൻസ്​ റൂമിൽ അറിയിക്കാം. അതേസമയം, മുനിസിപ്പാലിറ്റികളിലെ എമർജൻസി സംഘങ്ങൾക്ക്​ 130 മണിക്കൂർ തുടർച്ചയായി പ്രവർത്തിക്കുകയും കഴിഞ്ഞയാഴ്​ച പെയ്​ത മഴയിൽ കെട്ടിനിന്ന 380 ദശലക്ഷം ഗാലൻ വെള്ളം നീക്കുകയും ​െചയ്​തതായി റെയിൻഫാൾ എമർജൻസി കമ്മിറ്റി മേധാവി സഫർ മുബാറക്ക്​ അൽ ഷാഫി വ്യക്​തമാക്കി. പബ്ലിക്​ വർക്​സ്​ അതോറിറ്റി (അശ്​ഗാൽ) യുമായി സഹകരിച്ചും പ്രവർത്തിക്കുന്നുണ്ട്​. മഴയുടെ സാഹചര്യത്തിൽ എല്ലാ രീതിയിലുള്ള മുന്നൊരുക്കങ്ങൾ നടത്തിയിട്ടുണ്ടെന്നും പ്രധാന റോഡുകളും ടണലുകളും നിരീക്ഷിച്ചുകൊണ്ടിരിക്കുകയാണെന്നും അശ്​ഗാൽ സാമൂഹികമാധ്യമങ്ങളിലൂടെ വ്യക്​തമാക്കി. ശനിയാഴ്​ച ഉച്ചക്ക്​ പെയ്​ത മഴയിൽ ഹൈവേകളിലോ ടണലുകളിലോ വെള്ളം കെട്ടിനിൽക്കുന്നില്ലെന്നും അറിയിച്ചു.