തീവ്ര ന്യൂനമർദം ശക്​തിയാർജിക്കാൻ സാധ്യത; ദോഫാറിൽ മഴ തുടരുന്നു

മസ്​കത്ത്​: ദോഫാർ ഗവർണറേറ്റി​​െൻറ തീരപ്രദേശങ്ങളിൽ സ്​ഥിതി ചെയ്യുന്ന തീവ്ര ന്യൂനമർദം വരുന്ന മണിക്കൂറുകളിൽ ശക്​തി പ്രാപിച്ച്​ അതി തീവ്ര ന്യൂനമർദമായി മാറാൻ സാധ്യതയുണ്ടെന്ന്​ സിവിൽ ഏവിയേഷൻ പൊതുഅതോറിറ്റി ഏറ്റവും ഒടുവിൽ പുറത്തുവിട്ട മുന്നറിയിപ്പ്​ സന്ദേശത്തിൽ അറിയിച്ചു. നിലവിൽ കാറ്റി​​െൻറ വേഗത മണിക്കൂറിൽ 30 മുതൽ 45 കിലോമീറ്റർ വരെയാണ്​. അടുത്ത 24 മണിക്കൂറിനുള്ളിൽ നൂറ്​ മുതൽ 200 മില്ലീമീറ്റർ വരെ പെയ്യാനാണ്​ സാധ്യത. ശക്​തമായ കാറ്റും ഉണ്ടാകും. മഴയിൽ താഴ്​ന്ന പ്രദേശങ്ങളിലും തീര​മേഖലകളിലും വെള്ളപ്പൊക്കത്തിന്​ സാധ്യതയുള്ളതിനാൽ ജനങ്ങൾ ജാഗ്രത പാലിക്കണം. ശക്​തമായ ഒഴുക്കുണ്ടാകുമെന്നതിനാൽ വാദികൾ ആരും മുറിച്ച്​ കടക്കരുത്​. അൽ വുസ്​ത ഗവർണറേറ്റി​​െൻറ തെക്കൻ ഭാഗങ്ങളിൽ ഒറ്റപ്പെട്ട ശക്​തമായ മഴക്ക്​ സാധ്യതയുണ്ടെന്നും മുന്നറിയിപ്പ്​ സന്ദേശത്തിൽ പറയുന്നു.
സലാല നഗരത്തിലും പരിസര പ്രദേശങ്ങളിലും വെള്ളിയാഴ്​ച രാത്രി മുതൽ മഴക്ക്​ ശക്​തി കുറഞ്ഞതായി ഇവിടത്തെ താമസക്കാർ പറഞ്ഞു. ശനിയാഴ്​ച രാവിലെ മുതൽ ഉച്ചവരെ സമയത്തും കാര്യമായ ശക്​തിയില്ലാത്ത മഴയാണ്​ പെയ്​തതും. സലാലയുടെ പലഭാഗങ്ങളിലും വെള്ളക്കെട്ടുകളും കൂടുതലായി രൂപപ്പെട്ട്​ വരുകയാണ്​. താഴ്​ന്ന പ്രദേശങ്ങളിലെ വീടുകളിൽ വെള്ളം കയറുകയും വാഹനങ്ങൾ ഒലിച്ചുപോവുകയും ചെയ്​തു. അതിനിടെ കഴിഞ്ഞ ദിവസം ​െഎൻ റസാത്തിൽ ഒഴുക്കിൽപെട്ട രണ്ടാമത്തെ സ്വദേശിയുടെ മൃതദേഹവും കണ്ടു കിട്ടിയതായി റോയൽ ഒമാൻ പൊലീസ്​ അറിയിച്ചു. നിറഞ്ഞൊഴുകിയ വാദികളിൽ നിരവധി വാഹനങ്ങൾ കുടുങ്ങിയ സംഭവങ്ങളും റിപ്പോർട്ട്​ ചെയ്​തിട്ടുണ്ട്​. പല റോഡുകളിലും ഗതാഗതം തൽക്കാലത്തേക്ക്​ നിരോധിച്ചിട്ടുണ്ട്​. അതിനിടെ മഴയിൽ മലമുകളിൽ നിന്നും മറ്റും പാമ്പുകൾ ഒഴുകിവരാൻ സാധ്യതയുള്ളതിനാൽ ജാഗ്രത പുലർത്തണമെന്ന്​ ദോഫാർ നഗരസഭ അറിയിച്ചു.