പ്രവാസി മടക്കം രണ്ടാംഘട്ടം: ഒമാനിൽ നിന്നുള്ള ആദ്യ വിമാനം തിരുവനന്തപുരത്തിന്​

മസ്​കത്ത്​: ഒമാനിൽ കുടുങ്ങിയ ഇന്ത്യക്കാരെ തിരിച്ചെത്തിക്കാനുള്ള പ്രത്യേക വിമാന സർവിസുകളുടെ രണ്ടാം ഘട്ടത്തിലെ ആദ്യ വിമാനം തിരുവനന്തപുരത്തിന്​. മെയ്​ 17ന്​ മസ്​കത്തിൽ നിന്നാണ്​ സർവീസ്​. 20ന്​ സലാലയിൽ നിന്ന്​ കോഴിക്കോടിനാണ്​ അടുത്ത സർവിസ്​. 22ന്​ മസ്​കത്തിൽ നിന്ന്​ കണ്ണൂരിലേക്കും 23ന്​ കൊച്ചിയിലേക്കും വിമാനങ്ങൾ ഉണ്ടാകും. രണ്ടാം ഘട്ടത്തിൽ കേരളത്തിലേക്കുള്ള നാലെണ്ണം അടക്കം മൊത്തം എട്ട്​ സർവീസുകളാണ്​ ഒമാനിൽ നിന്ന്​ ഇന്ത്യയിലേക്ക്​ ഉള്ളത്​.  18ന്​ ഹൈദരാബാദ്​, 20ന്​ ബംഗളൂരു, 21ന്​ ദൽഹി, 23ന്​ ബീഹാറിലെ ഗയ എന്നിവിടങ്ങളിലേക്കാണ്​ മസ്​കത്തിൽ നിന്നുള്ള മറ്റ്​ സർവീസുകൾ.
എംബസിയിൽ രജിസ്​റ്റർ ചെയ്​തവരുടെ വിവരങ്ങൾ അടിസ്​ഥാനമാക്കിയാണ്​ യാത്രികരുടെ മുൻഗണനാ പട്ടിക തയാറാക്കുക. മുൻ സർവീസുകളെ പോലെ അടിയന്തിര വൈദ്യ സഹായം ആവശ്യമുള്ളവർ, ഗർഭിണികൾ, ബുദ്ധിമുട്ടിലുള്ള തൊഴിലാളികൾ, മുതിർന്ന പൗരന്മാർ, ബുദ്ധിമു​േട്ടറിയ സാഹചര്യങ്ങളിൽ കുടുങ്ങികിടക്കുന്നവർ തുടങ്ങിയവർക്കായിരിക്കും മുൻഗണന. തെരഞ്ഞെടുക്കപ്പെടുന്ന യാത്രക്കാരെ എംബസി ഇമെയിൽ/ടെലിഫോൺ മുഖേന വിവരമറിയിക്കും. ഇവർ വിമാന കമ്പനി ഒാഫീസിൽ നിന്ന്​ ടിക്കറ്റ്​ വാങ്ങുകയാണ്​ വേണ്ടത്​. വലിയ അളവിലുള്ള അപേക്ഷകളാണ്​ എംബസിയിൽ ലഭിച്ചിട്ടുള്ളത്​. എല്ലാ അപേക്ഷകളും ഉടനടി പരിഗണിക്കാൻ സാധിക്കില്ല. അധിക വിമാന സർവീസുകൾ ഷെഡ്യൂൾ ചെയ്യുന്ന മുറക്ക്​ എംബസി അറിയിക്കും. അതുവരെ അപേക്ഷിച്ചവർ ക്ഷമയോടെ കാത്തിരിക്കണമെന്നും എംബസി പത്രകുറിപ്പിൽ അറിയിച്ചു. സാമൂഹിക അകലം പാലിക്കുന്നത്​ സംബന്ധിച്ച മാനദണ്ഡങ്ങൾ നിലവിലുള്ളതിനാൽ മുൻകൂർ അപ്പോയിൻമ​െൻറ്​ ഇല്ലാതെ എംബസി സന്ദർശനം ഒഴിവാക്കണമെന്നും അധികൃതർ അഭ്യർഥിച്ചു.