മസ്കത്ത്: ജലസേചന സ്രോതസ്സ് എന്നതിെനാപ്പം പ്രമുഖ വിനോദസഞ്ചാരകേന്ദ്രംകൂടിയാണ് ഖുറിയാത്ത് വിലായത്തിലെ വാദി ദൈഖ അണക്കെട്ട്.
ഇവിടെ അടുത്തിടെ ആരംഭിച്ച ബോട്ട് സവാരി സഞ്ചാരികൾക്ക് പ്രിയങ്കരമാവുകയാണ്. സ്വയം തുഴഞ്ഞുപോകാനാകുന്ന വാതകം നിറച്ച ബോട്ടുകളാണ് ഇവിടെയുള്ളത്. ഒരാൾക്കുള്ളത് മുതൽ നാലാൾക്കും അതിന് മുകളിലുള്ളവർക്കും കയറാവുന്ന വലിയ ബോട്ടുകളുമുണ്ട്. ലൈഫ് ജാക്കറ്റുകളും നൽകും. ഇതോടൊപ്പം സുരക്ഷ ഉറപ്പാക്കുന്നതിനായി ഒന്നിലധികം പേരുടെ സാന്നിധ്യവും ഉണ്ടാകും.
അണക്കെട്ടിന് താഴ്ഭാഗത്തായുള്ള തടാകത്തിലാണ് തുഴച്ചിൽ ബോട്ടുകൾ (റോവിങ്) ഏർപ്പെടുത്തിയിട്ടുള്ളത്. അറേബ്യൻ ഉപദ്വീപിലെതന്നെ ഏറ്റവും വലിയ അണക്കെട്ടുകളിൽ ഒന്നായ വാദി ദൈഖ അണക്കെട്ട് 2012ലാണ് തുറന്നത്. പർവതങ്ങളിൽ ഇടവേളകളിൽ പെയ്യുന്ന മഴവെള്ളം സമീപത്തെ ഗ്രാമങ്ങളിലേക്ക് കുത്തിയൊഴുകിയെത്താതിരിക്കാനുള്ള മുൻകരുതലായാണ് അണക്കെട്ട് നിർമിച്ചത്. പ്രതിവർഷം 35 ദശലക്ഷം ക്യുബിക് മീറ്റർ ജലം ഇവിടെ ശേഖരിക്കാൻ സാധിക്കും.
ഒമാനിലെ ഏറ്റവും വലിയ അണക്കെട്ടായ വാദി ദൈഖ മസ്കത്തിൽനിന്ന് എളുപ്പത്തിൽ എത്താനാകുമെന്നതിനാലാണ് സഞ്ചാരികളുടെ ഇഷ്ടകേന്ദ്രമാകുന്നത്. വാദി അദൈയിൽനിന്ന് 90 കിലോമീറ്ററാണ് ഇങ്ങോട്ടുള്ള ദൂരം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.