മസ്കത്ത്: ജൂലൈ-സെപ്റ്റംബര്‍ ടേമിലെ ഫീസ് ജൂണ്‍ 30ന് മുമ്പ് അടക്കണമെന്ന നിര്‍ദേശം സലാല ഇന്ത്യന്‍ സ്കൂള്‍ അധികൃതര്‍ പിന്‍വലിച്ചു.
ഇന്ത്യന്‍ വെല്‍ഫെയര്‍ ഫോറം സലാലയുടെ ഇടപെടലാണ് രക്ഷാകര്‍ത്താക്കള്‍ക്ക് ആശ്വാസമായത്. ഏപ്രില്‍-ജൂണ്‍ ടേമിലെ ഫീസടച്ച് ദിവസങ്ങള്‍ക്കകം തന്നെ ഇത്തരം ഒരു അറിയിപ്പ് വന്നത് രക്ഷിതാക്കള്‍ക്കിടയില്‍ കടുത്ത പ്രതിഷേധം ഉണ്ടാക്കി.
അവധിക്കാലം ആഘോഷിക്കാനായി നാട്ടിലേക്കുപോയ രക്ഷിതാക്കള്‍ക്കടക്കം കടുത്ത ഇരുട്ടടിയായിരുന്നു അധികൃതരുടെ ഈ തീരുമാനം. ഇത്തരത്തില്‍ ഉയര്‍ന്നുവന്ന പരാതിയുടെ അടിസ്ഥാനത്തില്‍ വെല്‍ഫെയര്‍ ഫോറം പ്രസിഡന്‍റ് യു.പി. ശശീന്ദ്രന്‍െറ നേതൃത്വത്തില്‍ സംഘടനാ നേതാക്കള്‍ സ്കൂള്‍ പ്രിന്‍സിപ്പല്‍, മാനേജ്മെന്‍റ് കമ്മിറ്റിയംഗങ്ങള്‍ എന്നിവരുമായി ചര്‍ച്ച നടത്തി.
ഇതിന്‍െറ അടിസ്ഥാനത്തില്‍ ജൂലൈ-സെപ്റ്റംബര്‍ ടേമിലെ ഫീസ് ആഗസ്റ്റ് 15ന് മുമ്പായി മാത്രം അടച്ചാല്‍ മതി എന്ന് സ്കൂള്‍ അധികൃതര്‍ അറിയിക്കുകയും സര്‍ക്കുലര്‍ ഇറക്കുകയും ചെയ്തു.
വാര്‍ഷിക സ്കൂള്‍ ഫീസ് 12 റിയാല്‍ വര്‍ധിപ്പിച്ച നടപടി പിന്‍വലിക്കണമെന്നും ഇന്ത്യന്‍ വെല്‍ഫെയര്‍ ഫോറം ആവശ്യപ്പെട്ടു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.