ലോക്​ഡൗൺ മാറി; ഇനി രാത്രി കർഫ്യൂ മാത്രം

കുവൈത്ത്​ സിറ്റി: െഎസൊലേഷൻ നിലവിലുണ്ടായിരുന്ന ഏക പ്രവിശ്യയായ ഫർവാനിയയും സ്വതന്ത്രമായതോടെ കുവൈത്ത്​ ഇനി ലോക്​ഡൗൺ മുക്​തം. രണ്ടരമാസമായി തുടരുന്ന ലോക്​ഡൗൺ പിൻവലിച്ചത്​ പ്രവാസി തൊഴിലാളികൾക്ക്​ ആശ്വാസമായി. പ്രദേശം വിട്ട്​ പുറത്തുപോവാൻ കഴിയാത്തതിനാൽ ഏറെപ്പേരാണ്​ ജോലിയില്ലാതെ ദുരിതത്തിലായത്​. െഎസൊലേഷൻ പിൻവലിച്ചതി​െൻറ ആഹ്ലാദം പ്രദേശവാസികൾ ​സമൂഹ മാധ്യമങ്ങളിലൂടെ പങ്കുവെച്ചു. 

മുൾവേലികളും കോൺക്രീറ്റ്​ തടസ്സങ്ങളും അധികൃതർ എടുത്തുമാറ്റുന്നത്​ ജനങ്ങൾ പലയിടത്തും സന്തോഷത്തോടെയും കൗതുകത്തോടെയും നോക്കിനിൽക്കുന്നത്​ കാണാമായിരുന്നു. മറ്റു പ്രദേശങ്ങളിലെ കമ്പനികളിൽ ജോലിയെടുക്കുന്നവരാണ്​ പുറത്തുപോവാൻ കഴിയാതെ വലഞ്ഞത്​​. സർക്കാറും സന്നദ്ധ സംഘടനകളും നൽകിയിരുന്ന ഭക്ഷണക്കിറ്റുകളായിരുന്നു പലർക്കും​ തുണ​. മറ്റു ഭാഗങ്ങളിലെ ​​െഎസൊലേഷൻ നേരത്തേ പിൻവലിച്ചതിനാൽ കഴിഞ്ഞ ദിവസങ്ങളിൽ സൗജന്യ ഭക്ഷണ വിതരണം ഫർവാനിയ കേന്ദ്രീകരിച്ചായിരുന്നു. അതേസമയം, രാജ്യവ്യാപകമായി രാത്രികാല കർഫ്യൂ കുറച്ചുദിവസം കൂടി തുടരും. ചൊവ്വാഴ്​ച മുതൽ കർഫ്യൂ രാ​ത്രി ഒമ്പത്​ മുതൽ പുലർച്ച മൂന്നു വരെയായി കുറച്ചു.