ഇന്ത്യൻ നഴ്സസ് ഫെഡറേഷൻ ഓഫ് കുവൈത്ത് ഭാരവാഹികൾ വാർത്തസമ്മേളനത്തിൽ
കുവൈത്ത് സിറ്റി: ഇന്ത്യൻ നഴ്സസ് ഫെഡറേഷൻ ഓഫ് കുവൈത്ത് (ഇൻഫോക്) അന്താരാഷ്ട്ര നഴ്സസ് ദിനാചരണം ‘ഫ്ലോറെൻസ് ഫിയസ്റ്റ- 2023’ എന്ന പേരിൽ ആഘോഷിക്കും. മേയ് 12ന് ആസ്പെയർ ഇന്ത്യൻ ഇന്റർനാഷനൽ സ്കൂൾ ജലീബ് അൽ ശുവൈഖിലാണ് പരിപാടി. കുവൈത്തിലെ ഇന്ത്യൻ സ്ഥാനപതി ഡോ. ആദർശ് സ്വൈക, കിഡ്നി ഫൗണ്ടേഷൻ ഓഫ് ഇന്ത്യ സ്ഥാപകൻ ഫാ. ഡേവിസ് ചിറമേൽ, കുവൈത്ത് ആരോഗ്യ മന്ത്രാലയത്തിലെ നഴ്സിങ് വിഭാഗം മേധാവികൾ എന്നിവർ പങ്കെടുക്കും.
സാംസ്കാരിക സമ്മേളനം, കലാപരിപാടികൾ, സീനിയർ നഴ്സുമാരെ ആദരിക്കൽ, അതുൽ നറുകരയും ‘സോൾ ഓഫ് ഫോക്’ ബാൻഡും അവതരിപ്പിക്കുന്ന സംഗീത വിരുന്ന്, മഹേഷ് കുഞ്ഞുമോൻ അവതരിപ്പിക്കുന്ന കോമഡി ഷോ എന്നിവ പരിപാടിയുടെ ഭാഗമാണ്.നഴ്സുമാർക്കായി പോസ്റ്റർ മത്സരം, സോങ് കോണ്ടെസ്റ്റ്, ഡാൻസ് കോണ്ടെസ്റ്റ് എന്നിവയും അംഗങ്ങളുടെ കുട്ടികൾക്കായി വിവിധ മത്സരങ്ങളും രാവിലെ ഒമ്പതു മണി മുതൽ ആരംഭിക്കുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. ‘ഇൻഫോക് മിറർ-2023’ എന്ന ഇൻഫോക്കിന്റെ മാഗസിനും വേദിയിൽ പ്രകാശനം ചെയ്യും.
2015 ഇൽ ജഹ്റ ഹോസ്പിറ്റൽ കേന്ദ്രീകരിച്ചു രൂപവത്കരിച്ച ഇൻഫോകിന് നിലവിൽ 1500ൽപരം അംഗങ്ങളുണ്ട്. കുവൈത്തിലെ മുഴുവൻ നഴ്സുമാർക്കും അംഗത്വം എടുക്കാൻ അവസരം ഒരുക്കുകയും യൂനിറ്റുകൾ രൂപവത്കരിക്കുകയും ചെയ്തതിനുശേഷമാണ് ആഘോഷം സംഘടിപ്പിക്കുന്നത്.
നിരവധി സാമൂഹിക ക്ഷേമ പ്രവർത്തനങ്ങൾ ചെയ്തുവരുന്ന ഇൻഫോക് തൃശൂർ ജില്ലയിൽ നിർമിച്ചുനൽകുന്ന വീടിന്റെ താക്കോൽ മേയ് ഏഴിന് നടക്കും. പൂർണമായും അംഗങ്ങൾ സ്വരൂപിച്ച തുകകൊണ്ടാണ് പ്രളയത്തിൽ നഷ്ടം സംഭവിച്ചയാൾക്ക് ഭവനനിർമാണം പൂർത്തിയാക്കിയത്.വാർത്തസമ്മേളനത്തിൽ പ്രസിഡന്റ് ബിബിൻ ജോർജ്, സെക്രട്ടറി രാജലക്ഷ്മി ശൈമേഷ്, ട്രഷറർ ജോബി ഐസക്, പ്രോഗ്രാം കോഓഡിനേറ്റർ ഗിരീഷ് കെ.കെ, മീഡിയ കൺവീനർ ഷൈജു കൃഷ്ണൻ എന്നിവർ പങ്കെടുത്തു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.