ഇസ്​ലാം-ക്രൈസ്​തവ സംവാദത്തിന്​ വേണ്ടിയുള്ള സ്​ഥിരം സമിതിയുടെ പ്രഥമയോഗം ചേർന്നു

മനാമ: സമാധാനത്തിന്റെയും സഹിഷ്ണുതയുടേയും സന്ദേശം ലോകമെമ്പാടും വ്യാപിക്കുക എന്ന രാജ്യത്തിന്റെ ലക്ഷ്യങ്ങൾക്കിണങ്ങുന്ന രീതിയിൽ മതാന്തരസംവാദങ്ങളെ പ്രോൽസാഹിപ്പിക്കുന്നതിനായി സംഘടിപ്പിച്ച ഇസ്‌ലാം-ക്രിസ്ത്യൻ സംഭാഷണത്തിനുവേണ്ടിയുള്ള സ്ഥിരം സമിതിയുടെ പ്രഥമ യോഗം നടന്നു. നീതിന്യായ, ഇസ്ലാമിക കാര്യ, എൻഡോവ്‌മെന്റ് മന്ത്രി നവാഫ് ബിൻ മുഹമ്മദ് അൽ മൗദ, സമിതി അംഗങ്ങളുമായി കൂടിക്കാഴ്ച നടത്തി.

വിവിധ ജനസമൂങ്ങൾക്കും സംസ്​കാരങ്ങൾക്കുമിടയിൽ സംവാദവും സഹവർത്തിത്വവും സാധ്യമാക്കാൻ രാജാവ്​ ഹമദ്​ ബിൻ ഈസ ആൽ ഖലീഫ നടത്തിക്കൊണ്ടിരിക്കുന്ന ​ശ്രമങ്ങളെ സമിതി പ്രത്യേകം അഭിനന്ദിച്ചു. ഇരു വിഭാഗങ്ങളും തമ്മിൽ സംവാദാത്​മക സൗഹാർദം രൂപപ്പെടുത്തുന്നതിന്​ മുൻകൈയെടു​ത്ത ബഹ്​റൈൻ നിലപാടിനെയുംയോഗം സ്വാഗതം ചെയ്​തു. മതാന്തര സംവാദങ്ങൾ പ്രോത്സാഹിപ്പിച്ച് വിവിധ ജനസമൂഹങ്ങൾക്കും സംസ്‌കാരങ്ങൾക്കുമിടയിൽ ആശയവിനിമയത്തിന് അവസരമൊരുക്കുക, അങ്ങനെ സഹവർത്തിത്വവും സഹിഷ്ണുതയും സമാധാനവും വ്യാപിപ്പിക്കുക തുടങ്ങിയ ലക്ഷ്യങ്ങൾ കൈവരിക്കാനുള്ള ബഹ്‌റൈനിന്റെ പ്രതിബദ്ധത അദ്ദേഹം ചൂണ്ടിക്കാട്ടി.അബൂദബി കേന്ദ്രമാക്കിയുള്ള മുസ്​ലിം പണ്ഡിത സമിതി വത്തിക്കാനുമായി ചർച്ചകളും സംവാദങ്ങളും നടത്തുന്നതിനുളള കരാറിൽ ഒപ്പുവെച്ചിരുന്നു. വിവിധ മത സമൂഹങ്ങൾക്കിടയിൽ സൗഹൃദവും യോജിപ്പും സാധ്യമാക്കുന്നതിനുളള അർഥപൂർണമായ ശ്രമങ്ങളുടെ ഭാഗമായാണ്​ ഇത്തരമൊരു ചിന്തക്ക്​ തുടക്കമിട്ടത്​.

കഴിഞ്ഞ നവംബറിൽ ബഹ്​റൈനിൽ വെച്ച്​ വത്തിക്കാനിലെ ഫ്രാൻസിസ് മാർപാപ്പയുടേയും ശൈഖുൽ അസ്​ഹർ ഡോ. അഹ്​മദ്​ അൽത്വയ്യിബിന്‍റെയും ​സാന്നിധ്യത്തിൽ കത്തോലിക്ക സഭയുടെ ഉയർന്ന വ്യക്​തിത്വങ്ങളും മുസ്​ലിം പണ്ഡിത സമിതിയും തമ്മിൽ ചരിത്രപരമായ കൂടിക്കാഴ്​ച നടന്നിരുന്നു. ഇരു മത നേതാക്കളും ഒരുമിച്ചിരുന്ന്​ വിവിധ സന്ദർഭങ്ങളിൽ ചർച്ച നടത്താനും അതുവഴി സമാധാനവും ശാന്തിയും സാധ്യമാക്കാനും ജനങ്ങൾക്കിടയിൽ രൂപപ്പെട്ടുവരുന്ന അകൽച്ചകൾ ഇല്ലാതാക്കി സൗഹൃദത്തിന്‍റെ അന്തരീക്ഷം രൂപപ്പെടുത്താനും തീരുമാനിച്ചിരുന്നു.