വളരെ അഭിമാനമുണ്ട്, ഈ പുരസ്കാരം സ്പെഷലാണ്; സന്തോഷം പങ്കുവെച്ച് മാധവൻ

 മുൻ ഐ.എസ്. ആർ.ഒ ശാസ്ത്രഞ്ജൻ നമ്പി നാരായണന്റെ ജീവിതത്തെ ആസ്പദമാക്കി നടൻ ആർ. മാധവൻ സംവിധാനം ചെയ്ത' റോക്കട്രി: ദ നമ്പി എഫക്ട് എന്ന ചിത്രത്തിനാണ് മികച്ച ഫീച്ചർ ഫിലിമിനുളള ദേശീയ പുരസ്കാരം ലഭിച്ചത്. മാധവൻ തന്നെയാണ് ചിത്രത്തിൽ നമ്പി നാരായണനെ അവതരിപ്പിച്ചത്. ഇപ്പോഴിതാ 'റോക്കട്രി: ദ നമ്പി എഫക്ടിന്റെ നേട്ടത്തിൽ സന്തോഷം പങ്കുവെക്കുകയാണ് നടൻ.

അവിസ്മരണീയമായ നിമിഷമെന്നാണ് പുരസ്കാരനേട്ടത്തെക്കുറിച്ച് നടൻ മിഡ് ഡേക്ക് നൽകിയ അഭിമുഖത്തിൽ പറഞ്ഞത്. 'റോക്കട്രിക്ക് മികച്ച ചിത്രത്തിനുള്ള ഈ ശ്രേഷ്ടമായ പുരസ്കാരം ലഭിച്ചതിൽ  എനിക്ക്  അഭിമാനമുണ്ട്. ഈ ചിത്രം എന്റെ ഹൃദയത്തോട്  ചേർന്നു നിൽക്കുന്നു. എന്റെ ആദ്യത്തെ സംവിധാന സംരംഭമാണിത്. ഈ പുരസ്കാരം  ജീവിതത്തിലെ യഥാർഥ ഹീറോ നമ്പി നാരായണന് സമർപ്പിക്കുന്നു. കൂടാതെ ഈ അവസരത്തിൽ തന്റെ ടീം അംഗങ്ങൾക്കും ആരാധകർക്കും നന്ദി അറിയിക്കുന്നു- നടൻ പറഞ്ഞു

ഇത് തനിക്ക് അവിസ്മരണീയമായ നിമിഷമാണ്. ചന്ദ്രയാൻ 3 വിജയകരമായി ലാൻഡ് ചെയ്ത അതേ സമയത്താണ് നമ്പി ഇഫക്ടിന് ദേശീയ പുരസ്കാരം ലഭിച്ചത്.  രാജ്യം മുഴുവൻ അഭിമാനിക്കുന്ന സമയമാണിത്- മാധവൻ കൂട്ടിച്ചേർത്തു.