''കോൺഗ്രസ്​ മുന്നോട്ടുപോകുന്നത്​ കണ്ണുകൾ അടച്ചുപിടിച്ച്​'- സ​ുഷ്​മിതയ​ുടെ രാജിക്കു പിന്നാലെ രൂക്ഷവിമർശനവുമായി കപിൽ സിബൽ

ന്യൂഡൽഹി: പ്രമുഖ വനിത നേതാവ്​ സുഷ്​മിത ദേവ്​ രാജി പ്രഖ്യാപിച്ചതിന്​ പിന്നാലെ കോൺഗ്രസ്​ നേതൃത്വത്തിനെതിരെ രൂക്ഷ വിമർശനവുമായി ​മുതിർന്ന നേതാവ്​ കപിൽ സിബൽ. പാർട്ടി നേതൃത്വം 'കണ്ണുകൾ മുറുക്കിയടച്ചാണ്​ മുന്നോട്ടുനീങ്ങുന്നതെ'ന്ന്​ അദ്ദേഹം കുറ്റപ്പെടുത്തി. ''സുഷ്​മിത ദേവ്​ പാർട്ടി പ്രാഥമിക അംഗത്വത്തിൽനിന്ന്​ രാജിനൽകുന്നു. യുവ നേതാക്കൾ വിട്ടുപോകു​േമ്പാൾ പഴിയേൽക്കേണ്ടിവരുന്നത്​ അതിനെ ശക്​തിപ്പെടുത്താൻ ശ്രമിക്കുന്ന ഞങ്ങൾ 'വൃദ്ധന്മാരാണ്''- ട്വീറ്റിൽ കുറ്റപ്പെടുത്തുന്നു. സമൂല മാറ്റം ആവശ്യപ്പെട്ട്​ കഴിഞ്ഞ വർഷം പാർട്ടി അധ്യക്ഷ സോണിയ ഗാന്ധിക്ക്​ തുറന്ന കത്തെഴുതിയ 23 നേതാക്കളിൽ കപിൽ സിബലുമുണ്ടായിരുന്നു. പുതിയ പ്രസ്​താവനയോടെ പാർട്ടിയിൽ പ്രതിസന്ധി രൂക്ഷമാകുന്നെന്ന സംശയം ബലപ്പെടുകയാണ്​.

നിലവിൽ മുഴുസമയ പ്രസിഡന്‍റി​ല്ലാതെയാണ്​ കോൺഗ്രസ്​ മുന്നോട്ടുപോകുന്നത്​. സോണിയ ഗാന്ധി പാർട്ടി വർകിങ്​ പ്രസിഡന്‍റാണ്​. പുതിയ പ്രസിഡന്‍റിനെ വെക്കാൻ പാർട്ടി തെരഞ്ഞെടുപ്പ്​ നടത്തണമെന്നായിരുന്നു സിബലിന്‍റെയും മറ്റു 22 പേരുടെയും ആവശ്യം. പ്രസിഡന്‍റായിരുന്ന രാഹുൽ ഗാന്ധി 2019ലെ തെരഞ്ഞെടുപ്പിൽ പാർട്ടി നേരിട്ട ദയനീയ പരാജയത്തെ തുടർന്ന്​ രാജിവെച്ചിരുന്നു.

സുഷ്​മിതക്കു മുമ്പും നിരവധി പേർ അടുത്തിടെയായി പാർട്ടി വിട്ടത്​ തലവേദന ഇരട്ടിയാക്കുന്നു. രണ്ടു തവണ ലോക്​സഭ എം.പിയും മുൻ കേന്ദ്രമന്ത്രിയുമായ ജിതിൻ പ്രസാദ, ഒരു വർഷം മുമ്പ്​ യുവ നേതാവ്​ ജ്യോതിരാദിത്യ സിന്ധി തുടങ്ങിയവരുടെ കൂടുമാറ്റം സൃഷ്​ടിച്ച ആശങ്കയൊഴിയും മുമ്പാണ്​ സുഷ്​മിതയുടെ രാജി. രാജസ്​ഥാനിൽ സചിൻ പൈലറ്റും സംസ്​ഥാന നേതൃത്വവുമായി പടലപ്പിണക്കം നിലനിൽക്കുന്നു. പഞ്ചാബിൽ നവ്​ജോത്​ സിങ്​ സിദ്ദു ഏറെയായി ഉയർത്തിയ പുക അടങ്ങിയെന്നു പറയാറായിട്ടില്ല​.

മുതിർന്ന കോൺഗ്രസ്​ നേതാവായിരുന്ന സ​ന്തോഷ്​ മോഹൻ ദേവിന്‍റെ മകളും 2014ൽ അസമിലെ സിൽചാറിൽനിന്ന്​ പാർലമെന്‍റിലേക്ക്​ തെരഞ്ഞെടുക്കപ്പെട്ടവരുമാണ്​ പാർട്ടി വിട്ട സുഷ്​മിത ദേവ്​. ഇവർ തൃണമൂൽ കോൺഗ്രസിൽ ചേരുമെന്നാണ്​ സൂചന.

ട്വിറ്റർ ഹാൻ്​ഡ്​ലിൽ കോൺഗ്രസ്​ നേതാവ്​ എന്ന വിശേഷണം മാറ്റി മുൻനേതാവ്​ എന്നാക്കിയതോടെയാണ്​ രാജി സൂചന ആദ്യം പുറത്തുവന്നത്​. ഇവർ കൊൽക്കത്തയിലെത്തി മമതയെ കണ്ട്​ അംഗത്വം സ്വീകരിക്കുമെന്ന്​ റിപ്പോർട്ടുകൾ പറയുന്നു.