നീല ജനാലകളുള്ള വീട്

നടുവളഞ്ഞ തെങ്ങിൽനിന്ന് വീണ

ഉണക്ക തേങ്ങകൾ

വേലിയേറ്റത്തിൽ,

കണ്ടത്തിൽനിന്നും

മുറ്റത്ത് വന്നു ഉമ്മ​െവയ്ക്കുന്ന

വടക്കേ തുരുത്തിലാണെന്റെ വീട്.

ഒന്നാം പാളി തുറക്കുമ്പോൾ

വിജാഗിരിക്ക് തുരുമ്പൊച്ച കേൾക്കുന്ന

ശരിയ്ക്കങ്ങ് തുറന്നിടുമ്പോളേക്ക്

ഉപ്പ്കാറ്റ്

നെറുകംതല വരെയടിക്കുന്ന,

ഈർപ്പമടിച്ച് മടുത്ത്

ഉറയുരിഞ്ഞ് തുടങ്ങിയ

നീല ജനലുകളുള്ള വീട്.

കുമ്മായപ്പൂശലുകൾ പൊഴിഞ്ഞുവീണ

ചോപ്പ്തറയിലേക്ക്

ഏറ്റത്തിൽ* വീടുകാണാനെത്തിയ

ഉപ്പ് വെള്ളത്തിൽ,

ചെമ്മീകുഞ്ഞുങ്ങൾടെ കലപില.

കുതിർന്ന കട്ടിലിനു മേലെ

ഒറ്റക്കയ്യൻ കസേരയും

പൂപ്പല് പടർന്ന പൂപ്പരത്തി പെട്ടിയും

രൂപക്കൂട്ടിലെ മഞ്ഞുമാതാവിനെയും

ഒതുക്കി​െവച്ച്,

ഓരോ ഏറ്റത്തിലും

പെറുക്കിക്കൂട്ടി മടുത്ത

സന്ധ്യാവിന്റെ കെട്ട്യാള് വെരോണി

എടപ്പള്ളിക്ക്** നേർന്ന പൂവനെയും കെട്ടിയിട്ട്

വളംകടികൊണ്ട്

പൊറുതിമുട്ടിയ

വെരലുകൾക്കിടയിൽ

ടർപ്പന്റൈൻ, തുണിയിൽ മുക്കിയൊപ്പി,

ഉപ്പ് വെള്ളത്തിൽ കുതിർന്ന

കട്ടിലിൽ ചുരുണ്ട് കിടന്നു.

==================

*വേലിയേറ്റം

**ഇടപ്പള്ളി പള്ളിയിൽ ഗീവർഗീസ് പുണ്യാളനുള്ള പൂവൻകോഴി നേർച്ച