രണ്ട് കവിതകള്‍

 1. അടുത്തിരിക്കുന്നവർ

അടുത്തിരിക്കുന്നവർ

ചിരിക്കുന്നുണ്ട്

മിണ്ടുന്നുണ്ട്

ആരും കാണാതെ

ഒളിഞ്ഞുനോക്കുന്നുണ്ട്

അടുത്തിരിക്കുന്നവർ

എപ്പോഴും,

പൊട്ടിച്ചിതറിയേക്കാവുന്ന

രണ്ടു രാഷ്ട്രങ്ങളാണ്

അതുകൊണ്ടാണ്

ഞാനിപ്പോഴും

അകന്നിരിക്കുന്നത്.

2. മഞ്ഞുകൊണ്ട് പണിയുന്ന വീട്

ഓരോ പ്രണയത്തിലും

ഒരു മരിച്ച വീടുണ്ട്

ആരും കാണാതെ നനയുന്നുണ്ടതെപ്പോഴും

ആ വീട്ടിലേക്ക് കയറാനൊരു വഴി

ഇറങ്ങുമ്പോൾ വഴിയേയില്ല.

ഓരോ പ്രണയവും

കണ്ണീരുകൊണ്ടെഴുതിയ മഹാകാവ്യമാണ്

അതുകൊണ്ടായിരിക്കണം

ദൂരെയാണെങ്കിലും നമ്മളിപ്പോഴും

കവിതയിൽ മഞ്ഞുകൊണ്ട് വീടു പണിയുന്നതും

മറ്റൊരാളെ കാത്തിരിക്കുന്നതും.