ഒരു ഉൾനിലപ്പോരാളി കാണുന്നു

വഴിച്ചെണ്ട വീക്കി

തെരുക്കൂത്തിൽ തങ്ക-

പ്പെരുമാൾത്തലപ്പാവു വെച്ചു

പ്രജായത്തക്കഴുത്തിൽ

മുറുക്കിപ്പിടിച്ചു

വിടില്ല ഞാൻ സത്യവഴിയെന്നു

ദൃഢപ്രതിജ്ഞ...

പിന്നെ വരട്ടുതത്ത്വവാതം കോച്ചിവലി

-ച്ചുന്മത്ത മെത്തയിൽ മയക്കം.

കരിംപുള്ളി കുത്തിയ

ചൂണ്ടുവിരലുകൾ

അറ്റു വീണൊരു

ബലികുടീരങ്ങൾ,

ചെമ്പട്ടു മൂടിയൊ-

രകിടുകൾ തുളുമ്പുന്ന

വന്ധ്യ വചനങ്ങൾ.

ഖജാനയ്ക്കൽ

വാരിവാരിത്തളർന്ന്,

വിനയനാട്യച്ചുഴികളിൽ

അടിയറ്റക്കുതിപ്പിൽ

പിടഞ്ഞ്,

ഒടുവിൽ:

ഇവിടെ നിസ്സഹായരായ്

വീണുപോയോരുടെ

അസ്ഥിമഞ്ചത്തി-

ലള്ളിപ്പിടിച്ചു കിടക്കെ,

ഹൃദയമുഷ്ടിയുയർത്തിയ

പോസുകൾ നിരവധി:

കൂസലില്ലാത്തൊരു

മത്തവിലാസ പ്രഹസനം.*

------------------------

* രാജാ മഹേന്ദ്ര വിക്രമവർമന്റെ സംസ്കൃത പ്രഹസനം. കാര്യസാധ്യത്തിനായുള്ള നേർച്ചയായി പണ്ട് ക്ഷേത്രങ്ങളിൽ മത്തവിലാസം കൂത്ത് നടത്തിയിരുന്നു.