ഈ ഒരേയൊരു പാട്ട്

അമ്മയോടെങ്ങനെ ചോദിക്കും

എനിക്കറിയില്ല,

ഹോട്സ്പോട് ഇട്ടു തരാൻ

അമ്മ എനിക്കു കയറ്റിത്തന്ന

ഡാറ്റ മുഴുവൻ തീർന്നശേഷം

അമ്മയോടെങ്ങനെ ചോദിക്കും

എനിക്കറിയില്ല,

ഹോട്സ്പോട് ഇട്ടുതരാൻ,

എങ്കിലെനിക്കീ പാട്ടു കേൾക്കാം

എങ്ങനെ പറയും അമ്മയോട്,

ഈ പാട്ടു കേൾക്കാൻ ഞാൻ

എത്ര വെറിപിടിച്ചിരിക്കുന്നെന്ന്

എങ്ങനെ പറയും,

ഈ ഒരേയൊരു പാട്ട്

എന്റെ രോഗമെല്ലാം മാറ്റുമെന്ന്.

അമ്മയോടെങ്ങനെ

പറയുമെന്നെനിക്കറിയില്ല

ഈ ഒറ്റപ്പാട്ടിനുശേഷം

തുണി ഞാൻ അലക്കാം

പാത്രം കഴുകാം

മുറി വൃത്തിയാക്കാം

എന്ന്

എങ്ങനെ പറയും അമ്മയോട്,

എനിക്കറിയില്ല

ഞാൻ കിടക്കയോട് ഒട്ടിയിരിക്കുന്നു

ഈ പാട്ടു കേൾക്കാതെ

എനിക്കനങ്ങാനാവുന്നില്ല

ആരെങ്കിലും പറയൂ

അമ്മയോട്.