ഗൾഫ്​ യാത്രികരുടെ ഇഷ്​ടകേന്ദ്രമായി ഖത്തർ

ദോഹ: ഖത്തറിലേക്കുള്ള സന്ദർശക പ്രവാഹത്തിൽ ഏറ്റവും സജീവമാകയത്​ ജി.സി.സി രാജ്യങ്ങളിൽ നിന്നെന്ന പ്ലാനിങ്​ ആൻറ്​ സ്​റ്റാറ്റിസ്​റ്റിക്​സ്​ അതോറിറ്റി (പി.എസ്​.എ) റിപ്പോർട്ട്​. ജൂണി​ൽ രാജ്യത്ത്​ എത്തിയ സന്ദർശകരിൽ 42 ശതമാനവും വിവിധ ഗൾഫ്​ രാജ്യങ്ങളിൽ നിന്നായിരുന്നുവെന്ന്​ റിപ്പോർട്ട്​ വ്യക്​തമാക്കുന്നു.

മുൻ വർഷങ്ങളെയും കഴിഞ്ഞ മാസങ്ങളെയും അപേക്ഷിച്ച്​ ഗൾഫ്​ രാജ്യങ്ങളിൽ നിന്നുള്ള ഖത്തർ സന്ദർശകർ വർധിച്ചതായും വെളിപ്പെടുത്തുന്നു. ഈ വർഷം ജൂണിൽ 1.18 ലക്ഷം പേരാണ്​ ജി.സി.സി കളിൽ നിന്നും എത്തിയത്​. ഈ വർഷം മേയ്​ മാസത്തിൽ ഇത്​ 1.04 ലക്ഷമായിരുന്നു. അതേസമയം, 2022 ജൂണിൽ ഇത്​ 59,620ഉം ആയിരുന്നു. മേയിലേതിനേക്കാൾ 13.6 ശതമാനമാണ്​ വർധനയെങ്കിൽ, മുൻ വർഷ​ത്തേക്കാൾ 99 ശതമാനം വർധനയുണ്ടായെന്ന്​ പി.എസ്​.എ റിപ്പോർട്ട്​ വിശദീകരിക്കുന്നു.

സൗദി അറേബ്യ, യു.എ.ഇ, കുവൈത്ത്​, ഒമാൻ, ബഹ്​റൈൻ എന്നീ ഗൾഫ്​ രാജ്യങ്ങൾ 42 ശതമാനം പങ്കുവെച്ചപ്പോൾ, മറ്റു അറബ്​ രാജ്യങ്ങളിൽ നിന്നും ജൂണിൽ ഖത്തറിലെത്തിയവർ ഒമ്പത്​ ശതമാനമാണ്​. അതായത്​ 26,261പേർ. മുൻ വർഷം ഇതേ മാസം ഇത്​ 10,134 ആയിരുന്നു.

ജൂണിലെ ബലിപെരുന്നാൾ അവധിക്കാലവും വേനലവധിയുടെ ആരംഭവുമെല്ലാമായിരുന്നു ഇത്രയേറെ വലിയ സന്ദർശക പ്രവാഹത്തിന്​ കാരണമായത്​. പെരുന്നാളിൻെറ ഭാഗമായി ഖത്തറിലെ വിവിധ ടൂറിസ്​റ്റ്​ കേന്ദ്രങ്ങൾ, ബീച്ചുകൾ, പൈത​ൃക സ്​ഥലങ്ങൾ എന്നിവടങ്ങളിൽ വലിയ തിരക്കാണ്​ അനുഭവപ്പെട്ടത്​. ഖത്തറിൽ നിന്നും സ്വദേശികളും താമസക്കാരും മറ്റു രാജ്യങ്ങളിലേക്ക്​ ഒഴുകിയപ്പോൾ, അതേപോലെ തന്നെ ഇതര ഗൾഫ്​, ഏഷ്യൻ രാജ്യങ്ങളിൽ നിന്ന്​ ഖത്തറിലേക്കും സന്ദർശകർ ഒഴുകിയെത്തി.

168,463 പേർ ജൂണിൽ വിമാനമാർഗമാണ്​ രാജ്യത്ത്​ എത്തിയത്​. 112,206 പേർ അതിർത്തി കടന്ന്​ കരമാർഗവും സന്ദർശകരായി എത്തി. ആകെ സന്ദർശകരിൽ 28 ശതമാനം പേരും ഏഷ്യൻ രാജ്യങ്ങളിൽ നിന്നുള്ളവരാണ്​. ഇന്ത്യ ഉൾപ്പെടെ രാജ്യങ്ങളിൽ നിന്നായി 78,045 പേരാണ്​ ജൂണിൽ എത്തിയത്​. പ്രവാസികളുടെ ബന്ധുക്കൾ ഉൾപ്പെടെയുള്ളവരും ഇതിൽ പെടും. മുൻവർഷത്തെ അപേക്ഷിച്ച്​ 131 ശതമാനമാണ്​ വർധനവ്​.