തെഹ്റാൻ: ഇഞ്ചുറി സമയത്തു ലഭിച്ച പെനാൽറ്റി കിക്ക് ലക്ഷ്യത്തിലെത്തിച്ച ഇന്ത്യ എ.എഫ്.സി അണ്ട൪ 16 ഏഷ്യാകപ്പ് ഫുട്ബാളിൽ കരുത്തരായ ചൈനയെ 2-2ന് തളച്ചു. അന്തിമ വിസിലിന് നിമിഷങ്ങൾ മാത്രമിരിക്കെ മിറോൺ മെൻഡെസ് നേടിയ ഗോൾ ഇന്ത്യക്ക് ആവേശോജ്ജ്വല സമനില സമ്മാനിക്കുകയായിരുന്നു. 19ാം മിനിറ്റിൽ ദാനിയൽ ലാഹ്ലിംപുയിയയിലൂടെ മുന്നിലെത്തിയ ഇന്ത്യക്കെതിരെ 21ാം മിനിറ്റിൽ ക്യാപ്റ്റൻ വാങ് ജിൻസിയാനും 32ാം മിനിറ്റിൽ ഷാങ് യൂനിങ്ങുമാണ് ഗോളുകൾ നേടിയത്. നേരത്തെ സിറിയയെയും സമനിലയിൽ തളച്ച ഇന്ത്യ ഗ്രൂപ് ‘ഡി’യിൽനിന്ന് ക്വാ൪ട്ട൪ കാണാതെ പുറത്തായെങ്കിലും അഭിമാനത്തോടെയാണ് നാട്ടിലേക്ക് മടങ്ങുന്നത്. ഇന്ത്യയുടെ സമനില ഗോൾ ചൈനയുടെ സാധ്യത ഇല്ലാതെയാക്കി. ഉസ്ബകിസ്താനെ തോൽപിച്ച് സിറിയക്ക് അതോടെ അവസരമൊരുങ്ങി. ആദ്യരണ്ടു സ്ഥാനക്കാരായി നാലു പോയൻറ് വീതമുള്ള ഉസ്ബകിസ്താനും സിറിയയും ക്വാ൪ട്ടറിൽ കടന്നു. ചൈനക്ക് മൂന്നും ഇന്ത്യക്ക് രണ്ടും പോയൻറാണുള്ളത്. ഇന്ത്യ ആദ്യ കളിയിൽ ഉസ്ബകിസ്താനോട് തോറ്റിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.