മുംബൈ: ബോളിവുഡിലെ സാജിദ്-വാജിദ് സംഗീത സംവിധായക ജോഡിയിലെ വാജിദ് ഖാൻ (42) അന്തരിച്ചു.
വൃക്കയിലെ അണുബാധയെ തുടര്‍ന്ന് മുംബൈ ചെമ്പുരിലെ സുരാന ആശുപത്രിയില്‍ ചികിത്സയിലായിരുന്നു. ആരോഗ്യനില മോശമായതിനെ തുടർന്ന് തിങ്കളാഴ്ച പുലര്‍ച്ചെയാണ് മരണം സംഭവിച്ചതെന്ന് സംഗീത സംവിധായകന്‍ സലിം മെര്‍ച്ചൻറ് പറഞ്ഞു. അതേസമയം, വാജിദിന് കോവിഡ് സ്ഥിരീകരിച്ചിരുന്നെന്ന് ഇന്ത്യ ടുഡേ ഉള്‍പ്പെടെയുള്ള ദേശീയ മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്.
കുറച്ചുമാസം മുമ്പ് വൃക്ക മാറ്റിവെച്ച ശേഷം അണുബാധ ഏറ്റതിനാൽ ചികിത്സയിലായിരുന്ന വാജിദ് കഴിഞ്ഞ നാല് ദിവസമായി വെൻറിലേറ്ററിലായിരുന്നു. സഹോദരന്‍ സാജിദുമായി ചേര്‍ന്ന് നിരവധി സിനിമകള്‍ക്ക് അദ്ദേഹം സംഗീതം ഒരുക്കിയിട്ടുണ്ട്‌. സൽമാൻ ഖാൻ സിനിമകളിലെ ഗാനങ്ങളിലൂടെയാണ് ഇരുവരും ശ്രദ്ധേയരായത്. സൽമാൻ ഖാൻ റമദാനിൽ പുറത്തിറക്കിയ ‘ഭായി-ഭായി’, ലോക്ഡൗണിൽ പുറത്തിറക്കിയ ‘പ്യാർ കരോന’ എന്നീ ഗാനങ്ങളിലും വാജിദ് സ്പർശമുണ്ടായിരുന്നു.
1998ൽ സൽമാൻ ഖാൻ ചിത്രമായ ‘പ്യാർ കിയാ തോ ഡർന ക്യാ’യിലെ ഗാനങ്ങൾക്ക് ഈണം പകർന്നാണ് സാജിദ്-വാജിദ് ജോഡി ബോളിവുഡിൽ രംഗപ്രവേശനം ചെയ്യുന്നത്. ഗർവ്, തേരേ നാം, തും കോ ന ഫൂൽ ജായേംഗെ, പാർട്ണർ, ദബാംഗ്, വാണ്ടഡ്, ഏക് ഥാ ടൈഗർ തുടങ്ങിയവയിലെ ഗാനങ്ങളെല്ലാം സൂപ്പർ ഹിറ്റുകളാണ്.
ഐ.പി.എല്‍ നാലാം സീസണിലെ ‘ധൂം ധൂം ധൂം ധമാക്ക’ എന്ന തീം സോങ് ഒരുക്കിയതും സാജിദ്-വാജിദ് കൂട്ടുകെട്ടാണ്. മരണവാര്‍ത്ത അറിഞ്ഞതിന് പിന്നാലെ പ്രിയങ്ക ചോപ്ര, പരിണീതി ചോപ്ര, വരുണ്‍ ധവാന്‍, ശങ്കര്‍ മഹാദേവന്‍, വിശാൽ ദദ്ലാനി, ഹർഷ്ദീപ് കൗർ തുടങ്ങി നിരവധി പ്രമുഖര്‍ സമൂഹ മാധ്യമങ്ങളിലൂടെ വാജിദിെൻറ വിയോഗത്തില്‍ അനുശോചിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.