ലോകമാപ്പിൽ ഇന്ത്യ തിളങ്ങുന്ന ചിത്രം പങ്കുവെച്ച്​ ബച്ചൻ; വാട്​സ്​ആപ്പ്​ അമ്മാവനെന്ന്​ പരിഹാസം

മുംബൈ: സമൂഹ മാധ്യമങ്ങളിൽ ഐക്യദീപം തെളിയിക്കൽ എന്ന മോദിയുടെ ക്യാംപയിന്​ നിരവധി ട്രോളുകളും ഏറ്റുവാങ്ങേണ്ടി വന്നിട്ടുണ്ട്​. അത്തരത്തിൽ ട്രോളൻമാർ പ്രചരിപ്പിച്ചതാണ്​​ ഇരുണ്ട ലോക മാപ്പിൽ ഇന്ത്യയുടെ ഭൂപടം മാത്രം വെട്ട ിത്തിളങ്ങുന്ന ചിത്രം. ‘നാസ പുറത്തുവിട്ട ചിത്രം’ എന്ന അടിക്കുറിപ്പിൽ പലരും തമാശ രൂപേണയാണ്​ അത്​ പങ്കുവെച്ചത്​ . എന്നാൽ ചിലർ അത്​ കാര്യമാക്കിയെടുക്കുകയും യാഥാർഥ്യമെന്ന രീതിയിൽ ഷെയർ ചെയ്യുകയും ചെയ്​തു.

ട്വിറ്ററിൽ അത്ത രമൊരു പോസ്റ്റ്​ പങ്കുവെച്ചത്​ സാക്ഷാൽ അമിതാഭ്​ ബച്ചനാണ്​. ‘ലോകം ഇരുട്ടിലായപ്പോൾ ഇന്ത്യ പ്രകാശിക്കുന്നു. ഇന്നത്തെ ചിത്രം എല്ലാ പറയുന്നുണ്ട്’​. റിഥിക ജെയിൻ എന്ന യൂസർ ട്വീറ്റ്​ ചെയ്​ത ചിത്രം ബച്ചൻ റി-ട്വീറ്റ്​ ചെയ്യുകയായിരുന്നു. ഇൗ ലോകം നമ്മെ കാണുന്നു.... ഞങ്ങൾ ഒന്നാണ്​ ബച്ചൻ കുറിച്ചു.

എന്നാൽ ബച്ച​​​െൻറ ട്വീറ്റിന്​ ആയിരക്കണക്കിന്​ പരിഹാസ മറുപടികളാണ്​ ലഭിച്ചത്​. ഇത്തരം വ്യാജ സന്ദേശങ്ങൾ പ്രചരിപ്പിക്കാതിരിക്കാൻ ചിലർ നിർദേശിച്ചപ്പോൾ എന്തെങ്കിലും പങ്കുവെക്കുന്നതിന്​ മുമ്പ്​ ചിന്തിക്കാനും കേവലം വാട്​സ്​ആപ്പ്​ അമ്മാവനെന്ന നിലയിലേക്ക്​ അധഃപതിക്കാതിരിക്കാനും ചിലർ ഉപദേശവുമായി എത്തി.

നാസ പുറത്തുവിട്ട ചിത്രമെന്ന നിലക്കല്ല ബച്ചൻ മറ്റൊരാൾ പോസ്റ്റ്​ ചെയ്​ത ചിത്രം പങ്കുവെച്ചതെങ്കിലും അദ്ദേഹത്തി​​​െൻറ ദിവസങ്ങൾക്ക്​ മുമ്പുള്ള പോസ്റ്റുകളെ എടുത്തുപറഞ്ഞാണ്​ ചിലർ പരിഹസിക്കുന്നത്​. മോദിയുടെ തന്നെ ക്യാംപയിനായിരുന്ന പ്ലേറ്റ്​ കൊട്ടൽ, വൈറസിനെ നശിപ്പിക്കുമെന്ന തരത്തിലുള്ള ട്വീറ്റും ബച്ച​​​െൻറതായി പുറത്തുവന്നിരുന്നു. ഇൗച്ചകളിലൂടെ കൊറോണ വൈറസ്​ മനുഷ്യരിലേക്ക്​ പടരുന്നതായി ചൈനീസ്​ വിദഗ്​ധർ കണ്ടെത്തിയെന്ന തരത്തിലുള്ള വിഡിയോ പങ്കുവെച്ചതിനും ബച്ചൻ വിമർശനം നേരിട്ടു. വാട്​സ്​ആപ്പ്​ ഫോർവാർഡുകളെ പോലെ ആളുകളിൽ തെറ്റിധാരണ പരത്തുകയാണ്​ ബച്ചനെന്നാണ്​ വിമർശകർ പറയുന്നത്​.

കോവിഡ്​ പശ്ചാത്തലത്തിൽ പ്രധാനമന്ത്രി നരേന്ദ്രമോദി ആഹ്വാനം ചെയ്​ത ഐക്യദീപം തെളിയിക്കൽ ചടങ്ങ്​ അവസാനിച്ചെങ്കിലും അതി​​​െൻറ പ്രതിധ്വനി ഇപ്പോഴും തുടരുകയാണ്​. രാജസ്ഥാനിൽ ഐക്യദീപത്തിന്​ പിന്തുണയുമായി പടക്കം പൊട്ടിക്കുന്നതിനിടെ കെട്ടിടത്തിന്​ തീപിടിച്ചത്​ വാർത്തയായിരുന്നു. ജനങ്ങൾ തീപ്പന്തങ്ങളുമായി തെരുവിൽ തടിച്ചുകൂടിയതും വലിയ വിവാദത്തിന്​ തിരികൊളുത്തിയിരുന്നു.