'ഓണത്തിനൊരുമുറം പച്ചക്കറി': ചുവന്നചീര മുറിച്ച് മുഖ്യമന്ത്രി ആദ്യവിളവെടുത്തു

തിരുവനന്തപുരം: സെക്രട്ടേറിയറ്റ് ദർബാർഹാളിന് മുന്നിലെ ചുവന്നചീര മുറിച്ച് മുഖ്യമന്ത്രി 'ഓണത്തിനൊരുമുറം പച്ചക്കറി'യുടെ ആദ്യ വിളവെടുത്തു. കൃഷിവകുപ്പി​െൻറ പദ്ധതിയുടെ ഭാഗമായി സെക്രട്ടേറിയറ്റ് ജീവനക്കാർ ഗ്രോബാഗുകളിൽ നട്ട ചീരയാണ് പാകമായത്. പദ്ധതിയുടെയും ആദ്യവിളവെടുപ്പി​െൻറയും ഉദ്ഘാടനം മുഖ്യമന്ത്രി നിർവഹിക്കണമെന്ന് മന്ത്രി വി.എസ്. സുനിൽകുമാർ ആവശ്യപ്പെട്ടു. തുടർന്നാണ് തിങ്കളാഴ്ച മുഖ്യമന്ത്രി സെക്രട്ടേറിയറ്റ് ഉദ്യോഗസ്ഥരുടെ സാന്നിധ്യത്തിൽ ചീര വിളവെടുപ്പ് നടത്തിയത്. സെക്രട്ടേറിയറ്റിൽ 500 ഗ്രോബാഗുകളിലും സെക്രട്ടേറിയറ്റ് അനക്സിന് മുകളിൽ 110 ഗ്രോബാഗുകളിലും പച്ചക്കറിക്കൃഷി ചെയ്യുന്നുണ്ടെന്ന് മന്ത്രി സുനിൽകുമാർ പറഞ്ഞു.