തോട്ടിൽ തള്ളിയ കോഴിമാലിന്യം പാടത്തെത്തി; ദുരിതം സഹിച്ച് നാട്ടുകാർ

പൂക്കോട്ടുംപാടം: രാത്രിയുടെ മറവിൽ തോട്ടിൽ തള്ളിയ കോഴി മാലിന്യം കനത്ത മഴയിൽ തോട് പൊട്ടി പാടത്തെത്തിയത് നാട്ടുകർക്ക് ദുരിതമായി. മേലെ കൂറ്റമ്പാറയിലെ തോടിനു സമീപമുള്ള പാടത്താണ് ബുധനാഴ്ച രാവിലെ വ്യാപകമായി കോഴിമാലിന്യം കണ്ടത്. നാട്ടുകാർ നടത്തിയ പരിശോധനയിൽ തോട്ടിലൊഴുക്കിയ മാലിന്യമാണ് പാടത്ത് അടിഞ്ഞുകൂടിയതെന്ന് കണ്ടെത്തി. വെള്ളത്തിൽ കിടന്നതിന്നാൽ മാലിന്യം ചീഞ്ഞുനാറാൻ തുടങ്ങിയിട്ടുണ്ട്. മദ്റസ, സ്കൂൾ കുട്ടികളും പൊതുജനങ്ങളും സഞ്ചരിക്കുന്ന ഈ ഭാഗത്ത് മാലിന്യം അടിഞ്ഞു കൂടിയതോടെ ജനങ്ങള്‍ ആശങ്കയിലാണ്. പൊലീസിനും ആരോഗ്യ വകുപ്പിനും പരാതി നൽകിയിട്ടുണ്ട്. --