ആ കുഞ്ഞുടുപ്പുകൾ പേരറിയാത്ത കൂട്ടുകാർ അണിയും കാരുണ്യ വഴിയിൽ തുറക്കൽ എച്ച്.എം.എസ്.എ.യു.പി.പി.എസിൽ വസ്ത്രശേഖരണം മഞ്ചേരി: ഒരുതവണ ഉപയോഗിച്ച് പിന്നെ എടുക്കാതെ അലമാരയിലിട്ടും കളറും നിറവും പിടിക്കാതെ മാറ്റിയിട്ടും വീടുകളിൽ വെറുതെ കിടന്ന ഉടുപ്പുകൾ കുരുന്നുകൾ ശേഖരിച്ചപ്പോൾ കാരുണ്യ വഴിയിലെ പുതിയ കാൽവെപ്പായി. മഞ്ചേരി തുറക്കൽ എച്ച്.എം.എസ്.എ.യു.പി സ്കൂളിലെ വിദ്യാർഥികളാണ് പേരറിയാത്ത നിർധനരായ കൂട്ടുകാർക്കായി പ്രത്യേക കവറുകളിലായി വലിപ്പവും ഇനവും തിരിച്ച് വസ്ത്രങ്ങൾ ശേഖരിച്ചത്. 'സുകൃതം' ജീവകാരുണ്യ പദ്ധതിയുടെ ഭാഗമായായിരുന്നു വസ്ത്ര ശേഖരണം. എല്ലാ വെള്ളിയാഴ്ചയും വിദ്യാർഥികൾ ശേഖരിക്കുന്ന ഒരു രൂപ നാണയം ഉപയോഗിച്ചാണ് ജീവകാരുണ്യ പദ്ധതികൾ. സ്കൂളിൽ നടന്ന ചടങ്ങിൽ എം. ഉമ്മർ എം.എൽ.എ മഞ്ചേരി ഗവ. മെഡിക്കൽ കോളജ് ആശുപത്രിക്ക് സമീപം പ്രവർത്തിക്കുന്ന സോളിഡാരിറ്റി യൂത്ത് മൂവ്മെൻറ് സേവന കേന്ദ്രത്തിലേക്ക് വസ്ത്രങ്ങൾ കൈമാറി. സോളിഡാരിറ്റി ജില്ല പ്രസിഡൻറ് സമീർ കാളികാവ് വസ്ത്രങ്ങൾ ഏറ്റുവാങ്ങി. എ.ഇ.ഒ സാജൻ, പ്രധാനാധ്യാപിക രാജേശ്വരി, പി.ടി.എ പ്രസിഡൻറ് വല്ലാഞ്ചിറ അബ്ദുൽ മജീദ്, സുകൃതം കൺവീനർ അബ്ദുൽ അലി, മുഹമ്മദ് ഷമീൽ, നാസർ കുരിക്കൾ, റഷീദ് കുരിക്കൾ, സി.ടി. അബ്ദുൽ ജലീൽ, ആസിഫ് മാസ്റ്റർ എന്നിവർ സംസാരിച്ചു. ഉപയോഗപ്രദമായ വസ്ത്രങ്ങൾ ശേഖരിച്ച് വേർതിരിച്ച് അർഹിക്കുന്നവർക്ക് എത്തിക്കാൻ സോളിഡാരിറ്റി തുടക്കമിട്ടതാണ് ഡ്രസ് ബാങ്ക് പദ്ധതി. മഞ്ചേരിയിലെ വ്യാപാരികളും ഇത്തരത്തിൽ കടകളിലെ വസ്ത്രങ്ങൾ നൽകിയിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.