പുതിയാപ്പ ബോട്ട് ജെട്ടി നിർമാണം പുരോഗമിക്കുന്നു

എലത്തൂർ: പുതിയാപ്പ ഫിഷിങ് ഹാർബറിൽ പുതുതായി നിർമിക്കുന്ന രണ്ടു ബോട്ട് ജെട്ടികളുടെ നിർമാണം പുരോഗമിക്കുന്നു. 11 കോടി രൂപ ചെലവഴിച്ചാണ് ബെർത്തിങ് ജെട്ടി നിർമാണ പ്രവൃത്തി. രണ്ടുമാസം മുമ്പാണ് പ്രവൃത്തി ആരംഭിച്ചത്. ഒന്നരവർഷംകൊണ്ട് നിർമാണം പൂർത്തീകരിക്കാനാണ് കരാർ. 20 വർഷത്തോളമായുള്ള ഹാർബറിൽ സ്ഥല സൗകര്യമില്ലാത്തതിനാൽ മത്സ്യത്തൊഴിലാളികളും മറ്റും ഏറെക്കാലമായി പ്രയാസപ്പെടുകയായിരുന്നു. വിശാലമായ ജെട്ടി യാഥാർഥ്യമാകുന്നതോടെ ജില്ലയിലെ മികച്ച ഹാർബറുകളിൽ ഒന്നായി പുതിയാപ്പ മാറും. 95 മീറ്റർ നീളത്തിലാണ് ഇരു ജെട്ടികളും നിർമിക്കുന്നത്. പൈലിങ് പ്രവൃത്തികളാണ് പുരോഗമിക്കുന്നത്. 149 പൈലിങ്ങുകൾക്ക് മുകളിലാണ് പ്ലാറ്റ്ഫോം നിർമിക്കുകയെന്ന് കരാറുകാരായ എം.എസ്. അബ്ദുൽ ഹക്കീം കമ്പനി ഉദ്യോഗസ്ഥർ പറഞ്ഞു.