ഇന്ധനവില വീണ്ടും കൂടിത്തുടങ്ങി

കൊച്ചി: 36 ദിവസത്തിനുശേഷം പെട്രോൾ, ഡീസൽ വില വീണ്ടും ഉയർന്നുതുടങ്ങി. ജൂൺ ഒന്നുമുതൽ പല ദിവസങ്ങളിലും നേരിയ തോതിൽ കുറയുകയും മറ്റുദിവസങ്ങളിൽ മാറ്റമില്ലാതെ തുടരുകയും ചെയ്ത വിലയാണ് വ്യാഴാഴ്ച വീണ്ടും ഉയർന്നത്. തിരുവനന്തപുരത്ത് പെട്രോളിനും ഡീസലിനും ലിറ്ററിന് യഥാക്രമം 17 പൈസയും 12 പൈസയും വ്യാഴാഴ്ച കൂടി. മേയ് 29ന് തിരുവനന്തപുരത്ത് പെട്രോൾ ലിറ്ററിന് 82.58 രൂപയും ഡീസലിന് 75.18 രൂപയും ആയിരുന്നു. ജൂൺ 26ന് ഇത് യഥാക്രമം 78.63, 72.14 രൂപയിൽ എത്തി. ഇതിനുശേഷം വില മാറ്റമില്ലാതെ തുടരുകയായിരുന്നു. വ്യാഴാഴ്ച തിരുവനന്തപുരത്ത് പെട്രോളിന് 78.80 രൂപയും ഡീസലിന് 72.26 രൂപയുമാണ്. കൊച്ചിയിൽ 77.43, 70.89 രൂപ. സംസ്ഥാന സർക്കാർ നികുതി ഇളവ് ചെയ്തതിനാൽ കേരളത്തിൽ ജൂൺ ഒന്നുമുതൽ ഇന്ധനവില ലിറ്ററിന് ഒരുരൂപ കുറഞ്ഞിട്ടുണ്ട്.