വന്ദേ ഭാരത് ട്രെയിനിന് തിരുവല്ലയിൽ സ്റ്റോപ്പ് വേണം -അപ്പർ കുട്ടനാടൻ വികസന സമിതി

തിരുവല്ല: വന്ദേ ഭാരത് ട്രെയിനിന് തിരുവല്ലയിൽ സ്റ്റോപ്പ് അനുവദിക്കണമെന്ന് ആവശ്യം. അപ്പർ കുട്ടനാടൻ വികസന സമിതി ചെയർമാൻ ജിജു വൈക്കത്തുശ്ശേരിയാണ് ഈ ആവശ്യമുന്നയിച്ചത്.

തിരുവനന്തപുരവും കൊല്ലവും കഴിഞ്ഞാൽ കോട്ടയത്താണ് സ്റ്റോപ്പ് ഉള്ളത്. ആലപ്പുഴ, പത്തനംതിട്ട ജില്ലകളിൽ ട്രെയിനിന് സ്റ്റോപ്പില്ല. നിരണം പള്ളി, പരുമല പള്ളി, ശ്രീവല്ലഭ ക്ഷേത്രം എടത്വപള്ളി, ചക്കുളത്ത് കാവ് തുടങ്ങിയ തീർത്ഥാടന കേന്ദ്രങ്ങളിലേക്ക് എത്താൻ തീർത്ഥാടകർക്ക് എളുപ്പം തിരുവല്ല റെയിൽവേ സ്റ്റേഷൻ ആണ്.

ഈ രണ്ട് ജില്ലകളിലെ യാത്രക്കാർക്ക് പെട്ടെന്ന് എത്തിച്ചേരാൻ കഴിയുന്ന സ്ഥലമെന്ന നിലയിൽ തിരുവല്ലയിൽ സ്റ്റോപ്പ് അനുവദിക്കണമെന്ന് ജിജു വൈക്കത്തുശ്ശേരി ആവശ്യപ്പെട്ടു. 

സ്​റ്റോപ്പും നിരക്കും സമയ​ക്രമവും അന്തിമ തീരുമാനമായില്ല

തിരുവനന്തപുരം: ഇന്ന് കേരളത്തിലെത്തിയ വന്ദേഭാരത്​ ട്രെയിനിന്‍റെ സ്​റ്റോപ്പും നിരക്കും സമയ​ക്രമവും സംബന്ധിച്ച്​ അന്തിമ തീരുമാനമായിട്ടില്ല. കൊല്ലം, കോട്ടയം, എറണാകുളം ടൗൺ, തൃശൂർ, തിരൂർ, കോഴിക്കോട്, കണ്ണൂർ എന്നീ സ്റ്റോപ്പുകളാണ് പ്രതീക്ഷിക്കുന്നത്.
രാജ്യത്തെ 14ാമത്തെയും ദക്ഷിണ റെയിൽവേയിലെ മൂന്നാമത്തെയും വന്ദേഭാരത്​ ട്രെയിൻ ആണ് കേരളത്തിലെത്തിയത്. തിരുവനന്തപുരം -കണ്ണൂർ റൂട്ടിലാണ്​ കേരളത്തിലെ ആദ്യ വന്ദേഭാരത്​ സർവിസ്​ നടത്തുക.