കാട്ടാനകൾ ഏറ്റുമുട്ടി; കൊമ്പൻ ചെരിഞ്ഞു

മാനന്തവാടി: തിരുനെല്ലി പഞ്ചായത്തിലെ ആലത്തൂർ കാളിക്കൊല്ലിക്കു സമീപം കാട്ടാനകൾ ഏറ്റുമുട്ടിയതിനെ തുടർന്ന് കൊമ്പനാന ചെരിഞ്ഞു.

45 വയസ്സുള്ള കൊമ്പനാണ് ചെരിഞ്ഞത്. ബേഗൂർ റേഞ്ചിൽപ്പെട്ട വനത്തിൽ കഴിഞ്ഞ രാത്രി പത്തോടെയാണ് സംഭവമെന്ന് വനപാലകർ പറഞ്ഞു.

ചെരിഞ്ഞ കൊമ്പ​െൻറ വയറിലും തലയിലും ശ്വാസകോശത്തിലും ഹൃദയത്തിലും ആഴത്തിലുള്ള മുറിവുകളുണ്ട്. വെറ്ററിനറി സർജൻ ഡോ. അരുൺ സഖറിയയുടെ നേതൃത്വത്തിൽ പോസ്​റ്റ്മോർട്ടം നടത്തി. ജഡം വനത്തിൽ സംസ്കരിച്ചു.

നോർത്ത് വയനാട് ഡി.എഫ്.ഒ രമേശ് ബിഷ്ണോയ്, ബേഗൂർ റേഞ്ച്​ ഓഫിസർ വി. രതീശൻ, ​ഫ്ലയിങ് സ്ക്വാഡ് ഉദ്യോഗസ്ഥർ എന്നിവർ സ്ഥലത്തെത്തി പരിശോധന നടത്തി.