പട്ടികജാതി ക്ഷേമ ഫണ്ട് തട്ടിപ്പ് കേസിലെ പ്രധാന പ്രതി അറസ്​റ്റിൽ

തിരുവനന്തപുരം: കോര്‍പറേഷനിലെ പട്ടികജാതി ക്ഷേമ ഫണ്ട് തട്ടിപ്പ് കേസിലെ പ്രധാന പ്രതിയായ ഉദ്യോഗസ്ഥന്‍ കീഴടങ്ങി. പട്ടികജാതി വികസന വിഭാഗത്തിലെ സീനിയര്‍ ക്ലര്‍ക്കായിരുന്ന കാട്ടാക്കട വീരണകാവ് പട്ടകുളം അനിഴം വീട്ടില്‍ ആര്‍.യു. രാഹുലാണ് മ്യൂസിയം പൊലീസ്‌ സ്​റ്റേഷനിലെത്തി കീഴടങ്ങിയത്. രാഹുലിൻെറ മുന്‍കൂര്‍ ജാമ്യാപേക്ഷ ഹൈകോടതി തള്ളിയിരുന്നു. പട്ടികജാതി വിഭാഗത്തിന് ലഭിക്കുന്ന വിവാഹ ധനസഹായം, പഠനമുറി, സ്‌കോളര്‍ഷിപ്പുകള്‍ തുടങ്ങിയവയാണ് രാഹുലും സംഘവും തട്ടിയെടുത്തത്. ഗുണഭോക്താക്കള്‍ക്ക് അനുവദിക്കുന്ന തുക സ്വന്തം അക്കൗണ്ടിലേക്കും സുഹൃത്തുക്കളുടെയും ബന്ധുക്കളുടെയും ബാങ്ക് അക്കൗണ്ടുകളിലേക്കും മാറ്റുകയാണ് ചെയ്​തിരുന്നത്. ഗുണഭോക്താക്കളുടെ ബാങ്ക് അക്കൗണ്ട് നമ്പര്‍ മാറ്റിനല്‍കിയായിരുന്നു പണം തട്ടിയത്. പഠനമുറിക്കായി അനുവദിച്ച തുക ലഭിക്കാത്തതിനെതുടര്‍ന്ന് ഗുണഭോക്താവ് കോര്‍പറേഷനില്‍ പരാതിയുമായെത്തിയപ്പോഴാണ് മാസങ്ങളായി നടത്തിയിരുന്ന തട്ടിപ്പ് പുറത്തറിഞ്ഞിത്. തുടര്‍ന്ന് കോര്‍പറേഷന്‍ സെക്രട്ടറി പൊലീസിനും പട്ടികജാതി വകുപ്പിനും പരാതി നല്‍കുകയായിരുന്നു. ഇതിന് തൊട്ടു മുമ്പ്​ രാഹുല്‍ വെള്ളനാട് ബ്ലോക്ക് പഞ്ചായത്തിലേക്ക് സ്ഥലം മാറിപ്പോയിരുന്നു. തട്ടിപ്പ് കണ്ടെത്തിയതോടെ രാഹുലിനെയും കൊല്ലത്തേക്ക് സ്ഥലം മാറിപ്പോയ സീനിയര്‍ ക്ലര്‍ക്ക് കല്ലുവാതുക്കല്‍ ജൂലി വിഹാറില്‍ പൂര്‍ണിമ കാണിയെയും സസ്‌പെന്‍ഡ്​ ചെയ്തു. കോര്‍പറേഷനിലെ എസ്.സി പ്രമോട്ടര്‍മാരായ വട്ടിയൂര്‍ക്കാവ് മഞ്ചാടിമൂട് സ്വദേശി എസ്.ബി. വിശാഖ് സുധാകരന്‍, ഈഞ്ചക്കല്‍ സ്വദേശി സംഗീത എന്നിവരെ പിരിച്ചുവിടുകയും ചെയ്തു. എന്നാല്‍, ഈ കേസില്‍ രാഹുലിൻെറ ഒരു ബന്ധുവിനെ മാത്രമാണ് പൊലീസ് ഇതുവരെ അറസ്​റ്റ്​ ചെയ്തത്. പട്ടികജാതി വകുപ്പി​ൻെറ പ്രാഥമിക അന്വേഷണത്തില്‍ മുക്കാല്‍ കോടിയോളം രൂപയുടെ തട്ടിപ്പ് നടന്നതായാണ് കണ്ടെത്തിയിട്ടുള്ളത്. കേസില്‍ പ്രതികളായ പത്തു പേര്‍ക്കുള്ള അന്വേഷണം നടക്കുകയാണെന്ന് മ്യൂസിയം പൊലീസ് പറയുന്നു. ഫോട്ടോ ക്യാപ്ഷൻ: അറസ്​റ്റിലായ ആർ.യു. രാഹുൽ