പ്രോട്ടോകോൾ ലംഘന വിവാദത്തിൽ മുഖ്യമ​ന്ത്രിക്ക്​ മറുപടിയുമായി പ്രേമചന്ദ്രൻ എം.പി

തിരുവനന്തപുരം: പ്രോട്ടോകോൾ ലംഘന വിവാദത്തിൽ കുടുംബബന്ധം ചൂണ്ടിക്കാട്ടി പ്രതികരിച്ച മുഖ്യമന്ത്രിക്ക്, കോവിഡ്​ കാലത്തെ സ്വന്തം അനുഭവം വിശദീകരിച്ചും മുഖ്യമന്ത്രിയുടെ നടപടിയെ വിമർശിച്ചും ഫേസ്​ബുക്കിൽ എൻ.കെ. പ്രേമചന്ദ്രൻ എം.പിയുടെ കുറിപ്പ്​. താൻ ഡൽഹിയിലായിരിക്കെ, കോവിഡ് ബാധിതനായപ്പോൾ പരിചരിക്കാൻ ഭാ​ര്യ ഒപ്പം നിൽക്കാൻ അനുവദിക്കണമെന്ന് ചികിത്സ തേടിയ ഓൾ ഇന്ത്യ ഇൻസ്​റ്റിറ്റ്യൂട്ട് ഓഫ് മെഡിക്കൽ സയൻസ്​ ആശുപത്രി അധികൃതരോട് ആവശ്യപ്പെ​െട്ടങ്കിലും നിയമവും ചട്ടവും പ്രോട്ടോകോളും അനുവദിക്കാത്തതിനാൽ അനുവദിച്ചില്ല. നിത്യവും കഴിക്കുന്ന മരുന്നുകൾ ഏതൊക്കെയാണെന്നു​പോലും തനിക്ക്​ അറിയില്ലാതിരുന്നിട്ടും തങ്ങൾ രണ്ടുപേരും രണ്ടിടത്തായി. മുഖ്യമന്ത്രി നടത്തിയ കോവിഡ് പ്രോട്ടോകോള്‍ ലംഘനത്തെ ന്യായീകരിക്കാന്‍ കുടുംബബന്ധത്തെ പരാമര്‍ശിച്ച്​ നടത്തിയ പ്രതികരണം അത്രമേൽ മറുപടി അർഹിക്കുന്നതിനാലാണ്​ ഇക്കാര്യം കുറിച്ചത്​. കുടുംബബന്ധത്തി‍ൻെറ മഹത്വം പറഞ്ഞ്, ചെയ്ത ഗുരുതരമായ പ്രോട്ടോകോള്‍ ലംഘനത്തെ ന്യായീകരിക്കുന്ന മുഖ്യമന്ത്രി മറ്റുള്ളവരുടെ കുടുംബസ്നേഹം ഇങ്ങനെയായിരിക്കണമെന്നി​െല്ലന്ന്​ പരിഹാസച്ചുവയോടുള്ള പ്രതികരണവുമാണ്​ നടത്തിയത്​. ഒരിക്കലും ചെയ്യാന്‍ പാടില്ലാത്ത ഗുരുതരമായ പ്രോട്ടോകോള്‍ ലംഘനമാണ്​ നടത്തിയതെന്ന്​ മുഖ്യമന്ത്രി മനസ്സിലാക്കണം. സംഭവിച്ച വീഴ്ച സമ്മതിച്ചാല്‍ തീരുന്ന പ്രശ്നമേയുള്ളൂവെങ്കിലും നിര്‍ഭാഗ്യവശാല്‍ അത്​ ഉള്‍ക്കൊള്ളാനും അംഗീകരിക്കാനും മുഖ്യമന്ത്രി തയാറാകുന്നി​െല്ലന്ന്​ മാത്രമല്ല, എല്ലാവർക്കും അവരവരുടെ കുടുംബം അത്രയേറെ വലുതും സുദൃഢവുമാണെന്ന്​ മനസ്സിലാക്കാനുള്ള ഹൃദയവിശാലതയും ഇല്ലാതായിരിക്കുന്നു​. ഗുരുതരമായ ചട്ടലംഘനം കുടുംബത്തി‍ൻെറ പേരില്‍ ന്യായീകരിക്കുന്ന മുഖ്യമന്ത്രിക്ക്​ സാമൂഹിക അകലത്തെക്കുറിച്ചും ആരോഗ്യ പ്രോട്ടോകോളിനെക്കുറിച്ചും ജനങ്ങളോട് നിര്‍ദേശിക്കാന്‍ എന്ത് ധാര്‍മികതയാണുള്ളതെന്ന്​ ചോദിച്ച പ്രേമചന്ദ്രൻ, മുഖ്യമന്ത്രിയുടെ വാക്കുകളെ കേരളം എങ്ങനെ മുഖവിലക്കെടുക്കുമെന്നും ചോദിച്ചു. നിയമത്തിനു മുന്നില്‍ സർവരും സമന്മാരാണെന്ന്​ സംസ്ഥാനത്തി​ൻെറ ഭരണത്തലവന് തിരിച്ചറിയാൻ കഴിയാതെ പോകുന്നത് ജനാധിപത്യത്തി​ൻെറ ദുരന്തവും അധികാരം സമ്മാനിച്ച ഫാഷിസ്​റ്റ്​ പ്രവണതയുടെ പ്രതിഫലനവുമാണെന്നും അദ്ദേഹം ചൂണ്ടിക്കാട്ടി.​