'ആർട്ടീരിയ'ക്ക്​ പുതുജീവൻ; നവീകരണ പ്രവർത്തനങ്ങൾക്ക്​ ഇന്ന്​ തുടക്കം

തിരുവനന്തപുരം: തലസ്ഥാന വീഥിയിലെ ചുവരുകൾക്ക് സൗന്ദര്യം പകരാൻ ടൂറിസം വകുപ്പുമായി സഹകരിച്ച് 2015 ൽ തലസ്ഥാനത്ത് നടപ്പാക്കിയ 'ആർട്ടീരിയ'യുടെ മൂന്നാം ഘട്ട നവീകരണ പ്രവർത്തനങ്ങൾക്ക്​ വെള്ളിയാഴ്ച തുടക്കം കുറിക്കും. എൽ.എം.എസ് ജങ്​ഷനിൽ രാവിലെ എട്ടിന്​ മന്ത്രി കടകംപള്ളി സുരേന്ദ്രൻ ഉദ്​ഘാടനം ചെയ്യും. തലസ്ഥാനത്തെ സർക്കാർ സ്ഥാപനങ്ങളുടെ മതിലുകളിലും, ചുവരുകളിലുമൊക്കെ പോസ്​റ്റർ പതിച്ചും മറ്റും വൃത്തിഹീനമായി കിടന്ന സമയത്ത് 2015ൽ ജില്ല കലക്ടറായിരുന്ന ബിജു പ്രഭാകറി​ൻെറ നേതൃത്വത്തിലാണ് ആർട്ടീരിയ ആശയം മുന്നോട്ടുവെക്കുന്നത്​. ഇതിനായി തലസ്ഥാനത്തെ ആർട്ടിസ്​റ്റുകളുടെ കൂട്ടായ്മ മുന്നോട്ട് വരുകയും ഡി.ടി.പി.സിയുടെ നേതൃത്വത്തിൽ പദ്ധതി ആരംഭിക്കുകയും ചെയ്​തു. ടൂറിസം വകുപ്പുമായി ചേർന്ന് യൂനിവേഴ്സിറ്റി സ്​റ്റേഡിയം, ചന്ദ്രശേഖരൻനായർ സ്​റ്റേഡിയം, മാസ്കറ്റ് ഹോട്ടൽ, ടൂറിസം ഡയറക്ടറേറ്റ് , കോർപറേഷൻ, മ്യൂസിയം എന്നിവയുടെ പുറം ചുരവുകളിലും മതിലുകളിലും 25 കലാകാരന്മാരുടെ നേതൃത്വത്തിൽ 2015 ലും '16 ലുമായി രണ്ട് ഘട്ടമായി ചിത്രങ്ങൾ വരച്ച് മനോഹരമാക്കുകയായിരുന്നു. ചിത്രം വരച്ച ശേഷം മൂന്ന് വർഷമാണ് ഈ പദ്ധതി നിലനിൽക്കുമെന്ന് കരുതിയിരുന്നത്. അഞ്ച് വർഷം കഴിഞ്ഞതോടെ ചില ചിത്രങ്ങളിൽ കാലപ്പഴക്കം കൊണ്ടും പായലുകളും മറ്റും കാരണം കേടുപാടുകൾ വീണ സാഹചര്യത്തിലാണ് നവീകരിക്കാൻ തീരുമാനിച്ചത്​. ബിജുപ്രഭാകർ സിൽക്ക് മുഖേന സമർപ്പിച്ച പദ്ധതി നിർദേശം ടൂറിസം വകുപ്പ് അംഗീകരിക്കുകയായിരുന്നു. മുമ്പ്​ പദ്ധതി നടപ്പാക്കാൻ അനുവദിച്ച തുകയിൽ നിന്നും ബാക്കിയുള്ള രണ്ടര ലക്ഷം രൂപയും കൂടെ ചേർത്താണ് 12.5 ലക്ഷം രൂപക്ക്​ നവീകരണ പ്രവർത്തനങ്ങൾ നടത്തുന്നത്. നവീകരണ കമ്മിറ്റി അംഗം ബിജു പ്രഭാകർ, ക്യുറേറ്റർ ജി. അജിത്​ കുമാർ, കോ ക്യുറേറ്റർ അശോക്​ എന്നിവർ വാർത്തസമ്മേളനത്തിൽ പ​െങ്കടുത്തു.