വിജയത്തിലേക്കുള്ള അതിജീവന പാത പങ്കുവെച്ച്​ അനന്തു

മലപ്പുറം: 'നിങ്ങളുടെ ആഗ്രഹങ്ങളെ സഫലീകരിക്കാൻ കഠിനാധ്വാനം ചെയ്യുക, തൊഴിൽ നിങ്ങളെ തേടി വരും' -ജീവിത പ്രതിസന്ധികളെ കഠിനാധ്വാനം കൊണ്ട്​ കീഴടക്കി സംരംഭകനായി മാറിയ 25കാരനായ ഡോ. എസ്​. അനന്തുവിന്‍റെ വാക്കുകളാണിത്​. ഏറ്റവും താൽപപര്യമുള്ള ജോലി അതി താൽ​പര്യത്തോടെ ചെയ്യണമെന്ന്​ 'മാധ്യമം' എജു കഫേയിലെത്തിയ വിദ്യാർഥികളോടും രക്ഷി​താക്ക​ളോടും അദ്ദേഹം നിർദേശിച്ചു. പഠിച്ച്​ കൊണ്ടിരിക്കെ ആരംഭിച്ച ഓൺലൈൻ ക്ലാസുകൾ സൈലം ആപ്പും സൈലം സെന്‍ററുമായി മാറി​ ഒന്നരവർഷത്തിനുള്ളിൽ കേരളത്തിലെ മികച്ച ലേണിങ്​ ആപ്പായി വളർത്തിയ കഥ സദസ്സിലെ വിദ്യാർഥികൾക്ക്​ പ്രചോദനം നൽകി. നീറ്റ്, ജീ, കീം എൻട്രൻസ്​ പരിശീലനം ഓൺലൈനായും ഓഫ്​ലൈനായും നൽകുന്ന സ്ഥാപനമാണിത്​. 200 സ്ക്വയർ ഫീറ്റ്​ മാത്രമുള്ള ആലപ്പുഴയിലെ ഓഫിസ്​ മുറിയിൽനിന്ന്​ ഒന്നരലക്ഷം സ്​ക്വയർ ഫീറ്റിൽ 630ഓളം പേർക്ക്​ ​ജോലി നൽകുന്ന വലിയ സമുച്ചയത്തിലേക്കാണ്​ തന്‍റെ സ്വപ്​നത്തെ അദ്ദേഹം വളർത്തിയെടുത്തത്​. ചെറുപ്രായത്തിൽ ദാരിദ്രത്തെയും ജീവിത പ്രതിസന്ധികളെയും ആത്മവിശ്വാസവും കഠിനാധ്വാനവും കൊണ്ട്​ തോൽപിച്ച ഇദ്ദേഹം സൈലം ലേണിങ്​ ആപ്പിന്‍റെ സ്ഥാപനകനും സി.ഇ.ഒയുമാണ്. ഏറ്റവും കൂടുതൽ കഠിനാധ്വാനം ചെയ്​ത കാലഘട്ടമാണ് പ്ലസ്​ ടു. പത്താം ക്ലാസിൽ എല്ലാ വിഷയത്തിലും എ പ്ലസ്​ നേടാതിരുന്ന തനിക്ക്​ പ്ലസ്​ ടുവിന്​ 98 ശതമാനം മാർക്കും അഞ്ച്​ വിഷയത്തിന്​ മുഴുവൻ മാർക്കും നേടനായി' -അദ്ദേഹം പറഞ്ഞു. പ്ലസ്​ ടുവിനുശേഷം മെഡിക്കൽ എൻട്രൻസ്​ പരീക്ഷയിൽ 91 റാങ്ക്​ നേടി ആലപ്പുഴ മെഡിക്കൽ കോളജിൽനിന്നാണ്​ അനന്തു 2020ൽ​ എം.ബി.ബി.എസ് പൂർത്തിയാക്കിയത്​. പഠന സമയത്ത്​ അധ്യാപകൻ, ഹോസ്റ്റൽ വാർഡൻ, ആർക്കിടെക്​റ്റ്​, എൻജിനീയർ, ഇൻറീരിയർ ഡിസൈനർ തുടങ്ങി നിരവധി വേഷങ്ങൾ കെട്ടി. ചോർന്നൊലിക്കുന്ന വീട്ടിൽനിന്ന്​ പുതിയ വീട്ടിലേക്ക്​ മാറിയതിന്​ പിന്നിലും കഠിനാധ്വാനവും സ്വപ്​നം പൂർത്തിയാക്കാനുള്ള അടങ്ങാത്ത ആഗ്രഹവുമാണെന്ന്​ അദ്ദേഹം പറയുന്നു. രാജ്യത്തെ മുൻനിര വിദ്യാഭ്യാസ സ്ഥാപനങ്ങളിലേക്കും ഐ.ഐ.ടി, എൻ.ഐ.ടി എന്നിവിടങ്ങളിലേക്കുള്ള പ്രവേശനത്തിന്‍റെ വഴികൾ ​ഐ.ഐ.ടി മ​ദ്രാസ്​ പൂർവ വിദ്യാർഥിയും ​ട്രെയിനറും സൈലം ഫാക്കൽറ്റിയുമായ ആർ. മുഹമ്മദ്​ ഇഖ്​ബാൽ വിശദീകരിച്ചു.