ദിശതെറ്റിയ ഉരു മണൽ തിട്ടയിൽ ഇടിച്ചു നിന്നു

തിരൂർ: കടൽക്ഷോഭത്തിൽപ്പെട്ട് നിയന്ത്രണം വിട്ട ഉരു പുറത്തൂർ പടിഞ്ഞാറെക്കര അഴിമുഖത്ത് മണൽ തിട്ടയിൽ ഇടിച്ചു നിന്നു. തിങ്കളാഴ്ച രാത്രി 9 മണിയോടെയാണ് സംഭവം.

പടിഞ്ഞാറെക്കര അമ്പലപ്പടി ഭാഗത്ത് കരയിൽനിന്നും 50 മീറ്ററോളം ദൂരെയാണ് ഉരു മണൽതിട്ടയിൽപ്പെട്ട് കുടുങ്ങിക്കിടക്കുന്നത്. വേലിയേറ്റവും കടൽ ക്ഷോഭവുമുള്ളതിനാൽ നാട്ടുകാർക്ക് ബോട്ട് ഇറക്കാൻ കഴിയാത്ത സ്ഥിതിയാണ്.

ഉരുവിൽ 6 പേരുണ്ടെന്ന് സംശയിക്കുന്നതായി അധികൃതർ പറഞ്ഞു. ലൈഫ് ജാക്കറ്റ് അടക്കം ധരിച്ചാണ് ഇവർ നിൽക്കുന്നത്. ബോട്ടിലുള്ളവരെ കരയ്ക്കെത്തിക്കാൻ അധികൃതർ രക്ഷാപ്രവർത്തനം ആരംഭിച്ചു. ഉരു എവിടെനിന്നുള്ളതാ​െണന്ന്​ ഇതുവരെ വ്യക്തത വന്നിട്ടില്ല.

തിരൂർ പൊലീസ്, പൊന്നാനി ഫിഷറീസ്, തിരൂർ ഫയർഫോഴ്സ് എന്നിവർ സംഭവസ്ഥലത്തെത്തി രക്ഷാപ്രവർത്തനത്തിന് നേതൃത്വം നൽകുന്നുണ്ട്. നാട്ടുകാരുടെ നേത്യത്വത്തിൽ 12 പേർ രക്ഷാപ്രവർത്തനത്തിന് മുന്നിട്ടിറങ്ങിയിട്ടുണ്ട്. നാല് രക്ഷാപ്രവർത്തകർ ഉരുവിൽ കയറി കുടുങ്ങിക്കിടക്കുന്നവരെ കരയ്ക്കെത്തിക്കാനുള്ള ശ്രമവും തുടങ്ങി.