ഒല്ലൂർ മേൽപാലം: കൺഫ്യൂഷൻ തീർക്കണമേ...

ഒല്ലൂർ: റെയിൽവേ സ്റ്റേഷന്‍റെ തെക്ക് മേൽപാല നിർമാണം പ്രാദേശിക എതിർപ്പിനെത്തുടർന്ന് ഉപേക്ഷിക്കാൻ സാധ്യത. സംസ്ഥാന സർക്കാറിന്‍റെ 2018-19 വർഷത്തെ ബജറ്റിലാണ് ഒല്ലൂർ മേൽപാലം ഇടംപിടിച്ചത്. 2021ൽ മേൽപാലം നിർമാണത്തിന്​ റെയിൽവേ അനുമതിയും നൽകി. എന്നാൽ, പ്രാദേശിക എതിർപ്പുകളെത്തുടർന്ന് തുടർനടപടി ഉണ്ടായില്ല. നിർദിഷ്ട മേൽപാലത്തിൽനിന്ന്​ 500 മീറ്റർ വടക്കുമാറി അടിപ്പാതയും 400 മീറ്റർ തെക്കുമാറി മേൽപാലവും ഉള്ളതിനാൽ പുതിയ പാലം ആവശ്യമില്ലെന്നാണ് പ്രദേശവാസികളുടെ അഭിപ്രായം. എന്നാൽ, മേൽപാലം വേണ്ടെന്ന്​ പറയുന്ന അതേ കാരണത്താൽ റെയിൽവേ ലെവൽ ക്രോസ്​ അടക്കാൻ സാധ്യതയുണ്ട്​. ഈ സാഹചര്യം വിശദീകരിക്കാൻ സ്ഥലം എം.എൽ.എയുടെ സാന്നിധ്യത്തിൽ നാട്ടുകാരുടെയും ബന്ധപ്പെട്ട ഉദ്യോഗസ്ഥരുടെയും യോഗം വിളിച്ചുചേർക്കാൻ സർക്കാറിനോട് ജില്ല ഭരണകൂടം അനുമതി തേടിയിട്ടുണ്ട്​​​. ഷൊർണൂർ-കൊടുങ്ങല്ലൂർ റോഡിനെയും കൊച്ചി-സേലം ദേശീയപാത 544നെയും ബന്ധിപ്പിക്കുന്ന പൂച്ചിന്നിപ്പാടം-നടത്തറ റോഡിലാണ് ഒല്ലൂർ ഗേറ്റ് സ്ഥിതി ചെയ്യുന്നത്. ഈ റോഡിന്റെ പ്രാധാന്യം മനസ്സിലാക്കി കോടിക്കണക്കിന് രൂപ ചെലവാക്കിയുള്ള നവീകരണം പുരോഗമിക്കുകയാണ്. ഒല്ലൂർ ഗേറ്റ് സ്ഥിരമായി അടച്ചുകഴിഞ്ഞാൽ നിലവിൽ നടക്കുന്ന നവീകരണപ്രവർത്തനങ്ങൾ ഫലം കാണുകയില്ലെന്ന വാദം ഉയർത്തുന്നവർ മേൽപാലം വേണമെന്ന ആവശ്യക്കാരാണ്​. അടുത്തുള്ള അടിപ്പാത ചെറുവാഹനങ്ങൾക്ക് മാത്രം ഉപയോഗപ്രദമാകുന്നതാണ്. മേൽപാലത്തിലേക്ക് ഒല്ലൂർ ഗേറ്റിൽനിന്നുള്ള ലിങ്ക് റോഡ് ഏറെ ഇടുങ്ങിയതാണ്. ഇത്​ ഗതാഗതക്കുരുക്കിലേക്ക്​ കാര്യങ്ങൾ കൊണ്ടെത്തിക്കും. നിലവിലെ റോഡിന്‍റെ വടക്കുചേർന്ന്​ സാമൂഹികാഘാതം പരമാവധി കുറച്ച് മേൽപാലത്തിന് അലൈൻമെന്‍റ്​ തയാറാക്കാം. എന്നാൽ, അതിനുള്ള ശ്രമം പദ്ധതി നിർവഹണ ഏജൻസിയായ റോഡ്സ് ആൻഡ് ബ്രിഡ്ജസ് ഡെവലപ്മെന്റ് കോർപറേഷൻ ഇതുവരെ നടത്താത്തത് തികഞ്ഞ അലംഭാവമാണ്. മാത്രമല്ല, സംസ്ഥാന സർക്കാറിന്റെ നിർവഹണ ഏജൻസിക്ക് അപ്രോച്ച് ഭാഗങ്ങൾ മാത്രമേ നിർമിക്കാനാവൂ. റെയിൽവേ ട്രാക്കിന് മുകളിലെ ഭാഗം റെയിൽവേ നേരിട്ട് നിർമിക്കേണ്ടിവരും.