നിയമവ്യവസ്ഥ പ്രകൃതികേന്ദ്രീകൃതമാകണം -ജസ്റ്റിസ്​ ദേവൻ രാമച​ന്ദ്രൻ

കൊച്ചി: മനുഷ്യകേന്ദ്രീകൃതമായ നിയമവ്യവസ്ഥക്ക്​ പകരം ഭൂമി കേന്ദ്രീകൃതമായ വ്യവസ്ഥയാണ്​ ഇനി വേണ്ടതെന്ന്​ ഹൈകോടതി ജഡ്​ജി ജസ്റ്റിസ്​ ദേവൻ രാമചന്ദ്രൻ. മനുഷ്യർ ഈ പ്രകൃതിയുടെ ഒരുഭാഗം മാത്രമാണ്​. നമുക്ക്​ ജീവിക്കണമെങ്കിൽ പ്രപഞ്ചം മൊത്തത്തിൽ വേണം. നമ്മൾ മാത്രം ജീവിക്കുകയും ബാക്കിയെല്ലാം നശിപ്പിക്കുകയുമെന്നത്​ പാടില്ലാത്തതാണ്​. പ്രഫ. ലക്ഷ്​മണൻ നായർ എഴുതിയ 'ഒരുപിടി മണ്ണി'ന്‍റെ പ്രഫ. വിമല മേനോൻ രചിച്ച ഇംഗ്ലീഷ്​ പരിഭാഷ 'എ ഹാൻഡ്​ഫുൾ ഓഫ് എർത്തി'ന്‍റെ പ്രകാശനം ചെയ്യുകയായിരുന്നു അദ്ദേഹം. പശ്ചിമഘട്ട മലനിരകൾ പൊട്ടിച്ച്​ മൈതാനമാക്കി മാറ്റാൻ എന്നു തീരുമാനിക്കുന്നുവോ അന്ന്​ കേരളം ഇല്ലാതാകും. വികസനത്തിൽ മനുഷ്യൻ ഒരുഭാഗം മാത്രമാകണം. ഭൂമി കേന്ദ്രീകൃതമായ വികസന കാഴ്ചപ്പാട്​ ഉയർത്തുന്ന പ്രവർത്തനങ്ങൾ കേരളത്തിൽനിന്നുതന്നെ തുടങ്ങണം. കാരണം കേരളമാണ്​ ലോകത്തിൽ ഏറ്റവും പ്രകൃതിസുന്ദരമായ ഒരു സ്ഥലം. 40 വർഷംമുമ്പ് എറണാകുളത്ത്​​ സ്കൂളിൽ പഠിക്കുമ്പോൾ പൈപ്പിൽനിന്ന്​ നേരിട്ടാണ് താൻ​ വെള്ളം കുടിച്ചിരുന്നത്​. ഇന്നത്​ ആലോചിക്കാൻപോലും കഴിയില്ല. പുഴകൾ അടക്കമുള്ള ജലസ്രോതസ്സുകൾ മലിനമാക്കി പകരം പ്ലാസ്റ്റിക്​ കുപ്പിയിൽ വെള്ളം കൊണ്ടുനടന്ന്​ കുടിക്കുന്ന മോശം പ്രവണതയാണ്​ നമ്മൾ ശീലിക്കുന്നത്​. പ്രകൃതിക്കുവേണ്ടി ഹൈകോടതിയിൽ ന്യായാധിപന്മാർ വാദിക്കുന്നത്​ ഭരണഘടന വിഭാവനം ചെയ്യുന്ന ഉത്തരവാദിത്തത്തിന്‍റെ ഭാഗമായാണ്​. ആർട്ടിക്ൾ 51-എ പ്രകാരം പ്രകൃതി സംരക്ഷണം​ ഭരണഘടനപരമായ ചുമതലയാണ്​. എന്നാൽ, പൊതുജീവിതത്തിൽ ഈ ചുമതല നാം പുലർത്താറില്ലെന്നും അദ്ദേഹം പറഞ്ഞു​. ജസ്റ്റിസ്​ കെ. സുകുമാരൻ അധ്യക്ഷത വഹിച്ചു. സംസ്കൃത സർവകലാശാല വൈസ്​ ചാൻസലർ ഡോ. എം.വി. നാരായണൻ ആദ്യപ്രതി ഏറ്റുവാങ്ങി. ഇന്ത്യൻ സൊസൈറ്റി ഓഫ്​ ഓഥേഴ്​സ്​ സെക്രട്ടറി ജനറൽ ​ഡോ. രതി മേനോൻ, ജസ്റ്റിസ്​ പി.എസ്​. ഗോപിനാഥൻ, വി.എം. ഖാലിദ്​, ഡോ. വിനോദ്​കുമാർ, ഇടപ്പള്ളി രാധാകൃഷ്ണൻ എന്നിവർ സംസാരിച്ചു. ചിത്രം EKG ASH 1