സിൽവർ ലൈനിനെതിരെ ശാസ്ത്ര സാഹിത്യ പരിഷത്ത്​ വീണ്ടും രംഗത്ത്​

കണ്ണൂർ: സിൽവർലൈൻ പദ്ധതി നടപ്പാക്കുന്നതിനായി കെ. റെയിൽ അധികൃതർ നടത്തുന്ന ജനാധിപത്യ വിരുദ്ധ രീതികൾ അവസാനിപ്പിക്കണമെന്ന ആവശ്യവുമായി ശാസ്ത്ര സാഹിത്യ പരിഷത്ത് വീണ്ടും​ രംഗത്ത്​. സിൽവർ ലൈൻ പദ്ധതിയുടെ വിശദമായ ​പ്രോജക്ട്​ റിപ്പോർട്ട്​, പാരിസ്ഥിതിക ആഘാത പഠനം, സാമൂഹിക ആഘാത പഠനം എന്നിവയൊന്നും ജനങ്ങൾക്കിടയിൽ ചർച്ച ചെയ്യാതെയും റെയിൽവേ ലൈനി‍ൻെറ അലൈൻമെന്‍റ്​​ കൃത്യമായി നിർണയിക്കാതെയും കേരളത്തിൽ അങ്ങോളമിങ്ങോളം കല്ലുകൾ നാട്ടി അതിർത്തികൾ നിർണയിക്കുന്ന പ്രവർത്തനങ്ങൾ ജനാധിപത്യ വിരുദ്ധമായതിനാൽ അതിൽനിന്ന്​ കെ. റെയിൽ അധികാരികളും സംസ്ഥാന സർക്കാറും പിൻവാങ്ങണമെന്ന്​ ശാസ്ത്ര സാഹിത്യ പരിഷത്ത്​ സംസ്ഥാന കമ്മിറ്റി പ്രസ്താവനയിൽ ആവശ്യപ്പെട്ടു. വിദേശ ഫണ്ട്​​ ലഭിക്കാനാണ്​ ഇങ്ങനെ ചെയ്യുന്നതെന്ന കെ. റെയിൽ അധികൃതരുടെ വിശദീകരണം പ്രതിഷേധാർഹമാണെന്നും സംസ്ഥാന പ്രസിഡന്‍റ്​​ ഒ.എം. ശങ്കരനും ജനറൽ സെക്രട്ടറി പി. ഗോപകുമാറും പ്രസ്​താവനയിൽ വ്യക്​തമാക്കി. ഇതിനകം ലഭ്യമായ വസ്തുതകളും വിവരങ്ങളും വെച്ച്​ പരിശോധിക്കുമ്പോൾ കേരള വികസനത്തിനായിട്ടുള്ള പ്രവർത്തനങ്ങളിൽ ഇപ്പോൾ മുൻഗണന നൽകേണ്ട പദ്ധതിയല്ല കെ. റെയിൽ കമ്പനിയുടെ സിൽവർ ലൈൻ. കമ്പനിയുടെ വെളിപ്പെടുത്തൽ അനുസരിച്ച്​ സിൽവർലൈൻ, സമൂഹത്തിലെ സമ്പന്ന വിഭാഗങ്ങളുടെ താൽപര്യങ്ങൾക്കാണ്​​ മുൻഗണന നൽകുന്നത്​. സംസ്ഥാനത്തി‍ൻെറ വിവിധ സ്ഥലങ്ങളിൽ കെ. റെയിലി‍ൻെറ സ്​റ്റേഷനുകൾക്ക്​ അടുത്തായി ഉയർന്നുവരുന്ന പുതിയ ടൗൺഷിപ്പുകളെ ബന്ധപ്പെടുത്തിയുള്ള യാത്രാ സംവിധാനമായി വിഭാവനം ചെയ്ത പദ്ധതി, ഇവിടങ്ങളിൽ വരാനിരിക്കുന്ന റിയൽ എസ്​റ്റേറ്റ്​ ബിസിനസിൽ നിന്ന്​ മാത്രം 10,000 കോടിയിലേറെ രൂപ കെ. റെയിലിലേക്ക്​ വരുമാനമായി കണക്കാക്കുന്നുണ്ട്​. കെ. റെയിലി‍ൻെറ കണക്കനുസരിച്ചു തന്നെ നിലവിൽ ട്രെയിൻ യാത്ര ചെയ്യുന്നവരിൽ നിന്ന്​ ഉയർന്ന ക്ലാസുകാരെ മാത്രമേ സിൽവർ ലൈനിലേക്ക്​ പ്രതീക്ഷിക്കുന്നുള്ളു. സാധാരണക്കാരായ യാത്രക്കാർക്ക്​ ഇന്നത്തെ ഇഴഞ്ഞുനീങ്ങൽ തുടരട്ടെയെന്നും പണക്കാർ വേഗത്തിൽ യാത്ര ചെയ്യട്ടെയെന്നുമുള്ള കെ. റെയിൽ സമീപനം കേരളത്തി‍ൻെറ സമഗ്ര വികസനത്തിന്​ യോജിച്ചതല്ല. സിൽവർലൈനി‍ൻെറ നേട്ടം ന്യൂനപക്ഷത്തിനുമാത്രമാണെങ്കിലും അതി‍ൻെറ പാരിസ്ഥിതിക, സാമൂഹിക പ്രശ്നങ്ങളെല്ലാം അനുഭവിക്കേണ്ടി വരുന്നത്​ ഭൂരിപക്ഷം വരുന്ന സാധാരണക്കാരാണെന്നും പ്രസ്താവനയിൽ പറഞ്ഞു.