സഹകരണ 'യുദ്ധ'ത്തിലെ കോൺഗ്രസ്​ വിജയം

കണ്ണൂർ: സഹകരണ സംഘങ്ങൾ നിലനിർത്താനും പിടിച്ചെടുക്കാനും തെരുവുയുദ്ധങ്ങൾതന്നെ നടന്ന നാടാണ് കണ്ണൂർ​. ഈ ചരിത്രത്തിൽ​ കോൺഗ്രസിന് അഭിമാനമാകുന്ന വിജയമാണ്​ തലശ്ശേരി ഇന്ദിര ഗാന്ധി സഹകരണ ആശുപത്രി ഭരണസമിതി തെരഞ്ഞെടുപ്പ്​. കെ.പി.സി.സി അധ്യക്ഷൻ കെ. സുധാകര​ൻെറ രാഷ്​ട്രീയജീവിതത്തിലെ പൊൻതൂവൽകൂടിയാണ്​ ഈ ജയം. പാർട്ടിക്ക്​ കീഴിലുള്ള സഹകരണ സ്​ഥാപനങ്ങളെ പൂർണമായും പാർട്ടി നിയന്ത്രണത്തിന്​ കീഴിലാക്കുകയെന്ന അദ്ദേഹത്തി​ൻെറ പ്രവർത്തനത്തിന്​ വേഗം കൂട്ടുന്നതാണ്​ ജന്മനാട്ടിലെ ഈ ഉജ്ജ്വല വിജയം. മമ്പറം ദിവാകരനെ പുറത്താക്കി ആശുപത്രി ഭരണം പൂർണമായും പാർട്ടിക്ക്​ കീഴിലാക്കാനുള്ള ചരടുവലിയായിരുന്നു കെ. സുധാകരൻ ആദ്യംതൊ​ട്ടേ അണിയറയിൽ നടത്തിയത്​. പോൾ ചെയ്​തതിൽ 80 ശതമാനം വോട്ടും ഡി.സി.സിയുടെ ഔദ്യോഗിക പാനൽ നേടിയാണ്​ മിന്നും വിജയം കരസ്​ഥമാക്കിയത്​. ദിവാകര​ൻെറ പാനലിൽ സി.പി.എം നോമിനികൾ കൂടി ഉൾപ്പെട്ടിട്ടുണ്ടെന്നായിരുന്നു സുധാകര അനുകൂലികളുടെ ആരോപണം. മമ്പറം ദിവാകരൻ ജയിച്ചാൽ ക്രമേണ ആശുപത്രിഭരണം സി.പി.എമ്മി​ൻെറ കൈയിലെത്തുമെന്ന പ്രചാരണമാണ്​ കോൺഗ്രസ്​ നടത്തിയത്​. ഈ ത​ന്ത്രം കുറിക്കുകൊണ്ടു എന്നതാണ്​ തെരഞ്ഞെടുപ്പ്​ വിജയം വ്യക്​തമാക്കുന്നതും​. ഏറക്കാലമായി കണ്ണൂർ കോൺഗ്രസിലെ പ്രമുഖരായ ദിവാകരനും സുധാകരനും തമ്മിൽ പരസ്യ ഏറ്റുമുട്ടൽ തുടരുകയായിരുന്നു. ഇത്​ മൂർച്ഛിച്ചാണ്​ മമ്പറത്തിന്​ പാർട്ടിക്ക്​ പുറത്തേക്കുള്ള വഴിതെളിഞ്ഞതും. ജയിച്ചേ തീരൂ എന്ന വാശിയിലായിരുന്നു കോൺഗ്രസ്. ഇതി​ൻെറ ഭാഗമായി പരമാവധി വോട്ടർമാരെ എത്തിച്ച് തിരിച്ചറിയൽ കാർഡ് വാങ്ങിക്കാൻ പ്രാദേശിക നേതാക്കളോട് പാർട്ടി നിർദേശിച്ചിരുന്നു. കെ. സുധാകര‍​ൻെറ ജന്മനാട്ടിലെ പോരാട്ടം എന്നനിലക്ക്​​ ഡി.സി.സിക്കും തെരഞ്ഞെടുപ്പ്​​ നിർണായകമായിരുന്നു. എന്നാൽ, മമ്പറത്തി​ൻെറ പടിയിറക്കം ആശുപത്രി വികസനത്തെ പിന്നോട്ടടിക്കുമെന്ന ആശങ്ക പാർട്ടി പ്രവർത്തകർക്കിടയിലുണ്ട്​. കോൺഗ്രസിന് അഭിമാനമാകുന്നതരത്തിൽ ഇന്ദിര ഗാന്ധി ആശുപത്രിയെ ഉയർത്തിയത് ദിവാകര​ൻെറ സംഘാടകമികവാണെന്നതിൽ ആർക്കും സംശയമില്ല. ആശുപത്രിയെ ലാഭത്തിലെത്തിച്ചതും ദിവാകര​ൻെറ ഇടപെടലുകളായിരുന്നു. 10 കോടിയിൽപരം രൂപ ചെലവിൽ നിർമിക്കുന്ന സൂപ്പർ സ്പെഷാലിറ്റിയുടെ പ്രാരംഭഘട്ടത്തിലുള്ള പടിയിറക്കം ഒരുവേള പാർട്ടിക്ക്​ വലിയ വെല്ലുവിളിയായിരിക്കും ഉയർത്തുക. -പി.വി. സനൽ കുമാർ