കിനാലൂരിലെ ബാലുശ്ശേരി ഗവ. കോളജ് റോഡ് തകർന്ന് ചളിക്കുളമായി

ബാലുശ്ശേരി: കിനാലൂരിലെ ബി.ആർ അംബേദ്കർ മെമ്മോറിയൽ ഗവ. കോളജ് റോഡ് തകർന്ന് ചളിക്കുളമായി. കിനാലൂരിൽ പുതിയ ഗവ. കോളജ് കെട്ടിടം ഉദ്ഘാടനം കഴിഞ്ഞ് മൂന്നു വർഷങ്ങൾ പിന്നിട്ടെങ്കിലും കോളജിലേക്കുള്ള റോഡ് ഇപ്പോഴും കുണ്ടും കുഴിയുമായ നിലയിൽതന്നെയാണ്. കോളജിലേക്കുള്ള നിരവധി വിദ്യാർഥികൾ ഈ ചളിക്കുണ്ടുകൾ താണ്ടിയാണ് എത്തുന്നത്. വ്യവസായ വികസന കേന്ദ്രത്തിനകത്തുകൂടി കടന്നുപോകുന്ന ഈ റോഡിലൂടെതന്നെയാണ് കിനാലൂരിൽ എയിംസിനായി കണ്ടെത്തിയ ഭൂമിയിലേക്കുള്ള വഴിയും. കെ.എസ്.ഇ.ബിയുടെ 110 കെ.വി സബ് സ്റ്റേഷനിലേക്കുള്ള വഴിയും ഇതിലൂടെയാണ്. കാറ്റാടി ഭാഗത്ത് നിരവധി കുടുംബങ്ങൾ താമസിക്കുന്നുണ്ട്. തകർന്ന റോഡിലൂടെ തന്നെയാണ് നാട്ടുകാരുടെ യാത്രയും. എത്രയും വേഗം റോഡ് നവീകരിക്കണമെന്നാണ് നാട്ടുകാരുടെയും വിദ്യാർഥികളുടെയും ആവശ്യം.