കാമുകിയുടെ നഗ്​നചിത്രങ്ങൾ സമൂഹമാധ്യമങ്ങളിൽ പ്രചരിപ്പിച്ച യുവാവ്​ അറസ്റ്റിൽ

മൂന്നാർ: പ്രണയം നടിച്ച് പെൺകുട്ടിയുടെ നഗ്​നഫോട്ടോകൾ ശേഖരിച്ച് സമൂഹമാധ്യമങ്ങളിൽ പ്രചരിപ്പിച്ച യുവാവ്​ അറസ്റ്റിൽ. മൂന്നാർ നല്ലതണ്ണി ആറുമുറി ലയത്തിൽ സന്തോഷാണ്​ (27) പിടിയിലായത്. പെൺകുട്ടിയുടെ നഗ്​നചിത്രങ്ങൾ ഇവരുടെ ചില ബന്ധുക്കൾക്ക് വാട്സ്​ആപ്പിൽ ലഭിച്ചതോടെയാണ് പരാതി ഉയർന്നത്. കഴിഞ്ഞ ആഴ്ച ലഭിച്ച പരാതിയുടെ അടിസ്ഥാനത്തിൽ മൂന്നാർ എസ്​.എച്ച്​.ഒ മനേഷ് കെ. പൗലോസ് നടത്തിയ അന്വേഷണത്തിലാണ് പ്രതിയെ ചൊവ്വാഴ്ച അറസ്റ്റ് ചെയ്തത്. സംഭവം സംബന്ധിച്ച് പൊലീസ് പറയുന്നത്: സന്തോഷ് പെൺകുട്ടിയുമായി ബന്ധം സ്ഥാപിച്ച ശേഷം വിഡിയോ കാൾ ചെയ്ത് നഗ്നദൃശ്യങ്ങൾ മൊബൈലിൽ സ്ക്രീൻ ഷോട്ട് എടുത്ത് സൂക്ഷിച്ചു. ഇതിനിടെ പെൺകുട്ടി തമിഴ്നാട്ടിൽ പഠിക്കുന്ന മറ്റൊരു യുവാവുമായി അടുക്കുന്നതറിഞ്ഞ സന്തോഷ്​ ഈ ബന്ധം തകർക്കാനായി തന്‍റെ പക്കലുള്ള ചിത്രങ്ങൾ അയാൾക്ക് അയച്ചുകൊടുത്തു. ആ യുവാവ് ഈ ചിത്രങ്ങൾ പെൺകുട്ടിയുടെ ബന്ധുക്കൾക്ക് അയച്ചു കൊടുത്തതോടെയാണ് പെൺകുട്ടി ചതി തിരിച്ചറിഞ്ഞത്​. പെൺകുട്ടിയുടെയും പ്രതിയുടെയും ഫോണുകളിലെ ചാറ്റുകളും ചിത്രങ്ങളും മായ്ച്ചുകളഞ്ഞിരുന്നു. സൈബർ സെല്ലിന്റെ സഹായത്തോടെ ഒരാഴ്ച നീണ്ട അന്വേഷണത്തിലാണ് പ്രതി കുടുങ്ങിയത്. ചില തെളിവുകൾകൂടി ലഭിച്ചാൽ ഒരാളെക്കൂടി അറസ്റ്റ് ചെയ്യുമെന്ന് പൊലീസ്​ പറഞ്ഞു. എസ്.ഐ കെ.ഡി. മണിയൻ, എ.എസ്.ഐ സജി എം. ജോസഫ് എന്നിവരാണ് പ്രതിയെ അറസ്റ്റ് ചെയ്തത്. പ്രതിയെ ദേവികുളം കോടതിയിൽ ഹാജരാക്കി. ചിത്രം 1 അറസ്റ്റിലായ സന്തോഷ്