താൽക്കാലിക ജീവനക്കാരെത്തി; ഇനി കാഞ്ഞിരംവഴി ബോട്ട് സർവിസ്

പാറോച്ചാൽ, ചുങ്കത്തിൽ മുപ്പത്​, പതിനഞ്ചിൽകടവ്​, കാഞ്ഞിരം, ആർ-ബ്ലോക്ക്​, മറ്റ്​​ കായൽ പ്രദേശങ്ങളിലെ വിദ്യാർഥികൾക്ക്​ സ്കൂളിലെത്താം കോട്ടയം: കാത്തിരിപ്പിനൊടുവിൽ കോട്ടയം–ആലപ്പുഴ ബോട്ട് സർവിസ് കാഞ്ഞിരംവഴി. പൊക്കുപാലങ്ങൾ കടമ്പ തീർത്തതോടെ ഒരുവർഷമായി ബോട്ടുകൾ പള്ളം വഴിയായിരുന്നു സർവിസ്​ നടത്തിയത്​. ഇതുമൂലം ബോട്ടിനെ ആശ്രയിച്ചിരുന്ന വിദ്യാർഥികൾ, കർഷകർ, കർഷക തൊഴിലാളികൾ, മത്സ്യബന്ധന തൊഴിലാളികൾ എന്നിവർ​ ദുരിതത്തിലായിരുന്നു. പാറോച്ചാൽ, ചുങ്കത്തിൽമുപ്പത്​, പതിനഞ്ചിൽകടവ്​, കാഞ്ഞിരം, ആർ-ബ്ലോക്ക്​, മറ്റ്​​ കായൽ പ്രദേശങ്ങളിലെ വിദ്യാർഥികൾ ബോട്ട്​ സർവിസിനെ ആശ്രയിച്ചായിരുന്നു സ്കൂളിലേക്ക്​ എത്തിയിരുന്നത്​. കാഞ്ഞിരം എസ്​.എൻ.ഡി.പി സ്കൂളിലെ മാത്രം 90 കുട്ടികളാണ്​ ബോട്ടിനെ ആശ്രയിക്കുന്നത്​. ഇവരുടെ യാത്രക്ലേശത്തിന്​ പരിഹാരം കാണണമെന്നാവശ്യപ്പെട്ട് തിരുവാർപ്പ്​ പഞ്ചായത്ത്​ പ്രസിഡന്‍റ്​, കാഞ്ഞിരം സ്​കൂൾ അധികൃതരും ​കോട്ടയം നഗരസഭയെ സമീപിച്ചു. ജലഗതാഗത വകുപ്പും പാലങ്ങൾ നന്നാക്കണമെന്ന്​ നിരന്തരം ആവശ്യപ്പെട്ടു. ഇതോടെ തകരാറിലായിരുന്ന നാലു പൊക്കുപാലങ്ങളും അറ്റകുറ്റപ്പണി പണി നടത്തി. എന്നാൽ, ബോട്ടുകൾ കടന്നുവരുമ്പോൾ പാലങ്ങൾ ഉയർത്താൻ ജീവനക്കാരില്ലാത്തതിനാൽ സർവിസ്​ പുനരാരംഭിച്ചില്ല. പ്രതിഷേധം ഉയർന്നതോടെ കഴിഞ്ഞദിവസം താൽ​ക്കാലിക ജീവനക്കാരെ നഗരസഭ നിയോഗിച്ചു. നേരത്തേ പൊക്കുപാലങ്ങൾ ഉയർത്തിയവരെ തന്നെയാണ്​ വീണ്ടും ചുമതലപ്പെടുത്തിയത്​. ഇതോടെ വെള്ളിയാഴ്ച മുതൽ കാഞ്ഞിരംവഴി സർവിസ്​ പുനരാരംഭിച്ചു. കാഞ്ഞിരം ഭാഗത്തുള്ളവര്‍ക്ക് കോട്ടയം നഗരത്തിലേക്ക് എത്താനുള്ള യാത്രമാര്‍ഗം കൂടിയാണിത്​. കോട്ടയം-ആലപ്പുഴ റൂട്ടിൽ കാരാപ്പുഴ നാടങ്കരി പാലം, പതിനാറിൽചിറ പാലം, പാറേച്ചാൽ പാലം, ചുങ്കത്ത്​ മുപ്പത്​ ഇരുമ്പുപാലം, കാഞ്ഞിരം പാലം എന്നിങ്ങനെ അഞ്ച്​ പൊക്കുപാലങ്ങളുണ്ട്​​. മീനച്ചിലാറിനു കുറുകെ ഈ പാലങ്ങൾ ഉയർത്തിയാണ്​ ബോട്ടുകൾ കടത്തിവിടുന്നത്​. ഈ പാലങ്ങൾ തകരാറിലാകുന്നതോടെ​ ബോട്ടുകൾ കാരാപ്പുഴ, 16ൽചിറ, പാറോച്ചാൽ, ചായക്കട, ചാക്ക്, വെട്ടിക്കാട്, 12 പങ്ക്, എം.എം ബ്ലോക്ക് എന്നീ ജെട്ടികൾ ഒഴിവാക്കി പള്ളം പഴുക്കാനിലം വഴിയാണ് സർവിസ് നടത്തുക. കോടിമതയിൽനിന്നുള്ള രണ്ട്​ ബോട്ടുകളാണ്​ കോട്ടയം-ആലപ്പുഴ റൂട്ടിൽ സർവിസ്​ നടത്തുന്നത്​. പള്ളം വഴി സർവിസ്​ നടത്തുന്നത്​ ബോട്ടുകളുടെ വരുമാനത്തെയും ബാധിച്ചിരുന്നു. കൂടുതൽ സമയവും ഇതിന്​ ആവശ്യമായിരുന്നു.