അടിയന്തര പഞ്ചായത്ത് യോഗം നാളെ

കുണ്ടറ: അഞ്ചാം വാർഡ് പ്ലാച്ചിമുക്കിൽ ഏഴരമീറ്റർ താഴ്ചയിൽ മണ്ണെടുത്തതിനെ തുടർന്ന് വീട്​ അപകടത്തിലായ കുടുംബത്തിന്‍റെ ദുരിതത്തിന് പരിഹാരം കാണാൻ തിങ്കളാഴ്ച അടിയന്തര കമ്മിറ്റി ചേരും. വെള്ളിയാഴ്ച കലക്ടറുമായി നടത്തിയ ചർച്ചയിൽ പ്രശ്നം പഞ്ചായത്ത് പരിഹരിക്കണെന്ന് നിർദേശിച്ചിരുന്നു. ഇതിന്‍റെ അടിസ്ഥാനത്തിലാണ് നടപടി. നിലവിൽ സുമയുടെ വീടിനു സമീപം ലൈഫ് മിഷനായി സ്ഥലംവാങ്ങിയിരുന്ന മറ്റു മൂന്നുപേരുടെ വസ്തുവിലാണ്​ മണ്ണെടുത്തത്. ഏഴര മീറ്റർ ഉയരത്തിൽ നിൽക്കുന്ന സുമയുടെ താൽക്കാലിക വീട് നിൽക്കുന്ന സ്ഥലത്തെ കുറച്ച് മണ്ണുകൂടി എടുത്ത് നിരപ്പാക്കിയ ശേഷം സംരക്ഷണ ഭിത്തി കെട്ടി വീട് വെക്കാനുള്ള സാധ്യതയാണ് പഞ്ചായത്ത്​ ചർച്ച ചെയ്യുക. എൻ.ആർ.ഇ.ജി.എസ്​ ഫണ്ട് സംരക്ഷണ ഭിത്തി കെട്ടാനായി ലഭ്യമാകുമെന്നാണ് പ്രതീക്ഷ. യൂത്ത് കോൺഗ്രസ്​ പഞ്ചായത്ത്​ ഓഫിസ്​ മാർച്ചും ധർണയും നടത്തി (ചിത്രം) കുണ്ടറ: അനധികൃത മണ്ണെടുപ്പ് മൂലം കിടപ്പാടം അപകടത്തിലായ മുളവനയിലെ നിർധന കുടുംബത്തിന് പകരം വീടും സ്ഥലവും ലഭ്യമാക്കണമെന്നാവശ്യപ്പെട്ട് യൂത്ത് കോൺഗ്രസ് കുണ്ടറ നിയോജക മണ്ഡലം കമ്മിറ്റി നേതൃത്വത്തിൽ പഞ്ചായത്ത് ഓഫിസ്​ ഉപരോധിച്ചു. യൂത്ത് കോൺഗ്രസ്​ സംസ്ഥാന നിർവാഹക സമിതി അംഗം അനീഷ് പടപ്പക്കര ഉദ്ഘാടനം ചെയ്തു. ജില്ല ജനറൽ സെക്രട്ടറി സുമേഷ് ദാസ്​ അധ്യക്ഷതവഹിച്ചു. കുണ്ടറ പൊലീസിന്‍റെ മധ്യസ്ഥതയിൽ സമരക്കാരുമായി നടത്തിയ ചർച്ചയിൽ പഞ്ചായത്ത് ഭാഗത്തുനിന്നും വീഴ്ച സംഭവിച്ചതായി സെക്രട്ടറി സമ്മതിച്ചു. അടിയന്തര ഭരണസമിതി യോഗത്തിൽ വിഷയം ചർച്ച ചെയ്ത് പ്രശ്ന പരിഹാരം കാണുമെന്ന്​ അറിയിച്ചതോടെ സമരം അവസാനിപ്പിച്ചു. കോൺഗ്രസ്​ കൊറ്റങ്കര മണ്ഡലം പ്രസിഡന്‍റ്​ വിനോദ് കോണിൽ, മനു സോമൻ, അനൂപ് ആന്‍റണി, ശുഹൈബ് മേക്കോൺ, സെയ്ത്, നൗഷാദ്, ബാസിത് മാമൂട്, ഗെഗുൽ, നിതിൻ പേരയം, മാർക്ക് വോ ജോർജ്, വിപിൻ എന്നിവർ നേതൃത്വം നൽകി.