കോവിലകം ചിറ ശുചീകരണം തുടങ്ങി

നീലേശ്വരം: പായലും കുളവാഴയുംകൊണ്ട് മലിനമായ, നൂറ്റാണ്ടുകൾ പഴക്കവും ചരിത്രപ്രാധാന്യമുള്ളതുമായ നീലേശ്വരം കോവിലകം ചിറ ശുചീകരിക്കാനുള്ള ശ്രമങ്ങൾ വീണ്ടും ആരംഭിച്ചു. ഇത്തവണ യന്ത്രസഹായത്തോടെയാണ് ശുചീകരണം നടത്തുന്നത്. രണ്ട് അന്തർ സംസ്​ഥാന തൊഴിലാളികളുടെ നേതൃത്വത്തിലാണ് ചിറയിൽ നിന്ന് പായലുകൾ നീക്കി കരയിലേക്കിടുന്ന പ്രവൃത്തി നടക്കുന്നത്. നീലേശ്വരം നഗരസഭയും പടന്നക്കാട് കാർഷിക കോളജ് എൻ.എസ്.എസ് യൂനിറ്റും സംയുക്​തമായാണ് ശ്രമങ്ങൾ ആരംഭിച്ചത്. ഏക്കറോളം വിസ്തൃതിയിലുള്ള കോവിലകം ചിറ പായലുകൊണ്ട് നിറഞ്ഞിരിക്കുന്നതിനാൽ മനുഷ്യാധ്വാനംകൊണ്ട് ഇവ നീക്കം ചെയ്യൽ ഏറെ പ്രയാസകരമാണെന്ന് അധികൃതർക്ക് മനസ്സിലായി. തുടർന്ന് പടന്നക്കാട്​ കാർഷിക കോളജ് ഡീൻ ഡോ. സുരേഷ് മുൻകൈയെടുത്ത് കാർഷിക സർവകലാശാലയുടെ കോട്ടയം കുമരകം നെല്ല് ഗവേഷണ കേന്ദ്രത്തിൽനിന്ന്​ യന്ത്രം എത്തിക്കുകയായിരുന്നു. കരയിലും വെള്ളത്തിലും ഒരുപോലെ ഉപയോഗിക്കാൻ കഴിയുന്ന അൻഫിബ്യാൻ ബീഡ് കലക്ടർ യന്ത്രത്തി​ൻെറ സഹായത്തോടെയാണ് പായൽ നീക്കം ചെയ്യാൻ തുടങ്ങിയത്. 2017ൽ പുതുവർഷ ദിനത്തിൽ സർക്കാറി​ൻെറ ശുചിത്വ കേരളം പദ്ധതിയുടെ ഭാഗമായി നീലേശ്വരം കോവിലകം ചിറ ശുചീകരിച്ചാണ് മന്ത്രി ഇ. ചന്ദ്രശേഖരൻ ഉദ്​ഘാടനം നിർവഹിച്ചത്. നിരവധി ക്ലബുകളും സന്നദ്ധ സംഘടനകളും ചിറയിലിറങ്ങി പായൽ മുഴുവനായും നീക്കിയിരുന്നു. എന്നാൽ, രണ്ട് മാസങ്ങൾക്കുശേഷം വീണ്ടും പായൽ നിറഞ്ഞു. ഇപ്പോൾ യന്ത്രസഹായത്തോടെ ആരംഭിച്ച പായൽ നീക്കൽ പരിപാടി എത്രത്തോളം വിജയിക്കുമെന്ന് വരുംനാളുകളിൽ മാത്രമേ അറിയാൻ കഴിയൂ.