തൊടുപുഴ നഗരസഭ ബജറ്റ് വൈസ് ചെയര്പേഴ്സൻ ജെസി ആന്റണി
അവതരിപ്പിക്കുന്നു
തൊടുപുഴ: വികസനത്തിന് മുന്ഗണന നല്കി തൊടുപുഴ നഗരസഭയുടെ 2024-25 വര്ഷത്തെ വാര്ഷിക ബജറ്റ് വൈസ് ചെയര്പേഴ്സണ് ജെസി ആന്റണി അവതരിപ്പിച്ചു. 67,39,67,900 രൂപ വരവും 65,24,98,000 രൂപ ചെലവും 2,14,69,900 രൂപ നീക്കിയിരിപ്പും ഉള്ള ബജറ്റാണ് അവതരിപ്പിച്ചത്.
ആരോഗ്യ രംഗം, വിദ്യാഭ്യാസം, ശുചിത്വം, അമൃത് സമ്പൂര്ണ കുടിവെള്ള പദ്ധതി, തെരുവ് വിളക്കുകളുടെ പരിപാലനം തുടങ്ങിയവക്കും ബജറ്റില് പ്രഥമ പരിഗണന നല്കിയിട്ടുണ്ടെന്ന് വൈസ് ചെയര്പേഴ്സണ് വ്യക്തമാക്കി. വൃദ്ധസദനങ്ങളുടെ പ്രവര്ത്തനം കുറ്റമറ്റതാക്കൽ, പാലിയേറ്റീവ് കെയര് പ്രോഗ്രാം, വയോമിത്രം എന്നിവക്കും തുക വകയിരുത്തിയിട്ടുണ്ട്. നഗരസഭയിലെ സമഗ്ര മാലിന്യസംസ്കരണത്തിന് അഞ്ചുകോടി രൂപ വകയിരുത്തി.
പാറക്കടവില് കുമിഞ്ഞുകൂടിയ മാലിന്യം ശാസ്ത്രീയമായി നീക്കാൻ ആധുനിക രീതിയിലുള്ള ജൈവമാലിന്യ സംസ്കരണ സംവിധാനം ഒരുക്കും. ഒപ്പം ബയോ പാര്ക്കും പൂര്ത്തിയാകും. കര്ഷകര് നേരിടുന്ന പ്രശ്നങ്ങള് മനസിലാക്കി പരിഹരിക്കാൻ തെങ്ങ്, നെല്, പച്ചക്കറി കൃഷി വികസനത്തിന് 14 ലക്ഷം രൂപയുടെ പദ്ധതികള് ആവിഷ്കരിക്കും.
വിനോദസഞ്ചാരികളെയും വിപണനക്കാരെയും ആകര്ഷിക്കാൻ തൊടുപുഴ കാര്ണിവല് സംഘടിപ്പിക്കും. ഇതിനായി അഞ്ചുലക്ഷം രൂപ വകയിരുത്തി. ചെയര്മാന് സനീഷ് ജോര്ജ് അധ്യക്ഷത വഹിച്ചു. ബജറ്റിലുള്ള ചര്ച്ച 12ന് രാവിലെ 11.30ന് നടക്കും.
തൊടുപുഴ: ബജറ്റ് അവതരണത്തിന് പിന്നാലെ യു.ഡി.എഫ് കൗൺസിലർമാർ ബജറ്റ് കത്തിച്ച് പ്രതിഷേധിച്ചു. വാഗ്ദാനങ്ങൾ നടപ്പാക്കാതെ നഗരവാസികളെ കബളിപ്പിക്കാനുള്ള ബജറ്റാണ് അവതരിപ്പിച്ചതെന്നും ഈ വഞ്ചനയിൽ പ്രതിഷേധിച്ചാണ് കത്തിച്ചതെന്നും യു.ഡി.എഫ് കൗൺസിലർമാരായ അഡ്വ. ജോസഫ് ജോൺ, കെ ദീപക്, എം എ കരീം, സനു കൃഷ്ണൻ എന്നിവർ പറഞ്ഞു.
പ്രതിപക്ഷ കൗൺസിലർമാർ നഗരസഭക്ക് മുന്നിൽ ബജറ്റ് കത്തിച്ച് പ്രതിഷേധിക്കുന്നു
ഈ കൗൺസിലിന്റെ കാലത്ത് അവതരിപ്പിച്ച മൂന്ന് ബജറ്റുകളിലും നടപ്പാക്കുമെന്ന് പ്രഖ്യാപിച്ച 30 ഓളം പദ്ധതികൾ ആരംഭിക്കാൻ പോലും കഴിഞ്ഞില്ല. ഇപ്പോൾ അവതരിപ്പിച്ച നാലാമത്തെ ബജറ്റിൽ മുൻ ബജറ്റുകളിൽ പ്രഖ്യാപിച്ച പദ്ധതികൾ എല്ലാം ഉപേക്ഷിച്ചിരിക്കുകയാണ്. ഇത് വഞ്ചനയാണ്. ഈ വർഷത്തെ ബജറ്റിൽ നഗരസഭയുടെ വികസനത്തിന് ഉതകുന്ന ഒറ്റ പദ്ധതി പോലും ഉൾപ്പെടുത്തിയിട്ടില്ല.
ഒറവപ്പാറ ടൂറിസം പദ്ധതിയും റോപ് വേയും, മങ്ങാട്ടുകവല ബസ്റ്റാൻഡ് ഷോപ്പിംഗ് കോംപ്ലക്സ് നിർമാണം, പഴയ പഞ്ചായത്ത് ഓഫീസ് കെട്ടിടം പുനർനിർമാണം, ആധുനിക അറവുശാല, ഷീ ലോഡ്ജ്, തൊടുപുഴ ബോയ്സ് ഹൈസ്കൂളിന് കെട്ടിടം, സ്ഥലവും വീടും ഇല്ലാത്തവർക്ക് സ്ഥലം വാങ്ങി ഫ്ലാറ്റ് നിർമിക്കൽ, മുനിസിപ്പൽ ഓഫീസിന്റെ പുതിയ കെട്ടിട നിർമാണം, തൊടുപുഴ ബസ്റ്റാൻഡ് കംഫർട്ട് സ്റ്റേഷൻ നിർമാണം തുടങ്ങിയ പദ്ധതികൾ എല്ലാം ഈ ബജറ്റിൽ ഉപേക്ഷിച്ചു.
നഗരസഭയിൽ കെടുകാര്യസ്ഥതയും അഴിമതിയും കൊടികുത്തി വാഴുകയാണെന്നും അവർ പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.