സൗജന്യമായി സ്ഥലം; റോഡ് യാഥാർഥ്യമാകുന്നു

മുട്ടം: ഉടമകൾ സൗജന്യമായി സ്ഥലം വിട്ടുനൽകിയതോടെ വള്ളിപ്പാറ, എള്ളുംപുറം സ്വദേശികളുടെ വർഷങ്ങളായുള്ള ആഗ്രഹം സഫലമാകുന്നു. വള്ളിപ്പാറ-എള്ളുംപുറം റോഡാണ്​ നീണ്ട കാത്തിരിപ്പിനൊടുവിൽ യാഥാർഥ്യമാകുന്നത്​. രണ്ട് കിലോമീറ്റർ ദൂരമുള്ള പാതക്ക്​ ആവശ്യമായ ഭൂരിഭാഗം സ്ഥലവും ഉടമകൾ പഞ്ചായത്തിന് വിട്ടുനൽകിയിരുന്നു. ശേഷിക്കുന്നതുകൂടി ലഭിച്ചതോടെയാണ് ഇപ്പോൾ റോഡ്​ പൂർണമാകുന്നത്. ഇനി വള്ളിപ്പാറയിൽനിന്ന്​ എള്ളുംപുറത്ത്​ എത്താൻ അഞ്ച്​ കിലോമീറ്ററിലധികം ചുറ്റിസഞ്ചരിക്കേണ്ടത്​ 2.3 കിലോമീറ്ററായി ചുരുങ്ങും. ആറ്​ മീറ്റർ വീതിയിലാണ് റോഡ് ഒരുങ്ങുന്നത്. എന്നാൽ, ടാറിങ്, കോൺക്രീറ്റ് എന്നിവ ചെയ്ത് വഴി ഗതാഗതയോഗ്യമാക്കേണ്ടതുണ്ട്​. 2.3 കിലോമീറ്റർ ദൂരത്തിൽ ഒരു കിലോമീറ്ററോളം നിലവിൽ മൺ റോഡാണ്. കൂടാതെ മണ്ണെടുത്ത പ്രദേശത്ത്​ കൽകെട്ടുകളും പണിയേണ്ടതുണ്ട്. ത്രിതല പഞ്ചായത്ത് സംവിധാനം, എം.പി, എം.എൽ.എ എന്നിവരുടെ സഹായത്തോടെ എത്രയും വേഗം റോഡ് പൂർത്തീകരിക്കാനുള്ള ശ്രമത്തിലാണെന്ന് വാർഡ് അംഗം ടെസി സതീഷ് പറഞ്ഞു. tdl mltm 2 നിർമാണം പുരോഗമിക്കുന്ന വള്ളിപ്പാറ-എള്ളുംപുറം റോഡ്