'പഴയ ബസ്​സ്​റ്റാൻഡ്​​ മൈതാനമായി നിലനിർത്തണം'

തൊടുപുഴ: തൊടുപുഴയിലെ പഴയ ൈപ്രവറ്റ് ബസ്​സ്​റ്റാൻഡ്​​ ഇരിക്കുന്ന സ്ഥലവും ഫോറസ്​റ്റ്​ ഓഫിസിരുന്ന സ്ഥലവും ചേർത്ത് പൊതുമൈതാനമായി നിലനിർത്തണമെന്ന് അഡ്വ. ജോസഫ് ജോൺ നഗരസഭ കൗൺസിൽ ആവശ്യപ്പെട്ടു. ഈ സ്ഥലത്ത് മുനിസിപ്പാലിറ്റിയുടെ പുതിയ വികസന പ്രവർത്തനങ്ങൾ ആരംഭിക്കുന്നതിന് സ്ഥലം വിട്ടുനൽകണമെന്ന പ്രമേയത്തെ എതിർത്ത്​ സംസാരിക്കുകയായിരുന്നു അദ്ദേഹം. ഈ സ്ഥലം ഇപ്പോൾ നഗരസഭയുടെ കൈവശത്തിലാണ്. ഈ സ്ഥലത്ത് വാഹനങ്ങൾ പാർക്കുചെയ്യുന്നതിന് നഗരസഭ ലേലംചെയ്തുനൽകുകയും ഇതിനായി ഫീസ്​ പിരിക്കുകയും ചെയ്യുന്നുണ്ട്. ഈ സ്ഥലം മൈതാനമായി ഉപയോഗിക്കാൻ നഗരസഭക്ക്​ ഔദ്യോഗികമായി വിട്ടുനൽകണമെന്ന്​ ആവശ്യപ്പെട്ട് നഗരസഭ നേരത്തേ രേഖാമൂലം സർക്കാറിനോട്​ ആവശ്യപ്പെടുകയും പി.ജെ. ജോസഫ് എം.എൽ.എ നേരിട്ട് റവന്യൂ മന്ത്രിയോട് അഭ്യർഥിക്കുകയും ചെയ്തിട്ടുള്ളതാണ്​. ഇതിൻെറ ഫയൽ സർക്കാറിലുണ്ട്. ഈ ഫയലിൽ തീരുമാനമെടുക്കുന്നതിന്​ പകരം പുതിയ പ്രമേയം കൊണ്ടുവരേണ്ട ആവശ്യമില്ല. ഈ സ്ഥലം എറണാകുളം രാജേന്ദ്ര മൈതാനംപോലെ മനോഹരമാക്കുന്നതിനും സമീപത്തുള്ള മുനിസിപ്പൽ പാർക്കുമായി ബന്ധിപ്പിച്ച് നടപ്പാലം നിർമിക്കുന്നതിനുള്ള അഞ്ചുകോടിയുടെ ടൂറിസം പദ്ധതി പി.ജെ. ജോസഫ് എം.എൽ.എ തയാറാക്കി സമർപ്പിച്ചിട്ടുള്ളത് സംസ്ഥാന സർക്കാർ നയപരമായി അംഗീകരിച്ചിട്ടുണ്ടെന്ന്​ ജോസഫ്​ ജോൺ പറഞ്ഞു. ഇതിന്​ നഗരസഭ എൻ.ഒ.സി നൽകിയിട്ടുള്ളതിനാൽ ഈ സ്ഥലത്ത് പുതിയ വികസന പ്രവർത്തനങ്ങളുമായി വരുന്നത് അംഗീകരിക്കാനാകില്ല. നഗരസഭ ഓഫിസും പൊലീസ്​ സ്​റ്റേഷനും സിവിൽ സ്​റ്റേഷനും സ്ഥതിചെയ്യുന്ന സ്ഥലങ്ങളും റവന്യൂ സ്ഥലമാണ്. ഈ വസ്​തുക്കൾ പോലെ തന്നെയാണ് ബസ്​സ്​റ്റാൻഡ്​​ സ്ഥലവും വനം ഓഫിസിൻെറ സ്ഥലവും കൈവശം ​െവച്ചിട്ടുള്ളത്. ഈ സ്​ഥലം നഗരസഭയിൽനിന്ന്​ മാറ്റുകയില്ലെന്ന് മന്ത്രി തന്നെ എം.എൽ.എക്ക് ഉറപ്പുനൽകിയിട്ടുള്ളതാണെന്നും അദ്ദേഹം പറഞ്ഞു. പ്രമേയത്തിനെതിരെ കെ. ദീപക്, ടി.എസ്​. രാജൻ, സഫിയ ജബ്ബാർ എന്നിവരും അഭിപ്രായം രേഖപ്പെടുത്തി.