മാനം തെളിഞ്ഞു; നിയന്ത്രണങ്ങൾ നീക്കി

തൊടുപുഴ: പ്രതികൂല കാലാവസ്ഥയുടെ പശ്ചാത്തലത്തിൽ ജില്ലയിൽ ഏർപ്പെടുത്തിയ നിയന്ത്രണങ്ങൾ പിൻവലിച്ചു. രാത്രിയാത്ര നിരോധനം ഒഴികെയുള്ള നിയന്ത്രണങ്ങൾ നീക്കിയാണ്​ കലക്ടർ ഉത്തരവ്​ പുറപ്പെടുവിച്ചത്​. ജില്ലയിൽ മഴയുടെ ശക്തികുറയുകയും ഓറഞ്ച്​, റെഡ്​ അലർട്ടുകൾ നീങ്ങുകയും ചെയ്ത സാഹചര്യത്തിലാണ്​ നടപടി. കനത്ത മഴയിൽ മലയോര മേഖലയിൽ മണ്ണിടിച്ചിൽ, വെള്ളപ്പൊക്ക സാധ്യതകൾ നിലനിൽക്കുന്നത്​ കണക്കിലെടുത്ത്​ മ​ലയോര മേഖലകളിലേക്കുള്ള രാത്രിയാത്ര, ഓഫ്​ റോഡ്​ ട്രക്കിങ്​, ഖനന പ്രവർത്തനങ്ങൾ, ജലാശയങ്ങളിലെ മത്സ്യബന്ധനം, വിനോദസഞ്ചാര പ്രവർത്തനങ്ങൾ, സ്വകാര്യ മേഖലയിലേതടക്കം ബോട്ടിങ്ങുകൾ എന്നിവക്കാണ്​ മുൻകരുതൽ എന്ന നിലയിൽ വിലക്കേ​ർപ്പെടു​ത്തിയിരുന്നത്​. ഇതിൽ രാത്രി യാത്ര നിരോധനം ഒഴികെ എല്ലാ നിയന്ത്രണങ്ങളും പിൻവലിച്ചു. എന്നാൽ റെഡ്​, ഓറഞ്ച്​ മുന്നറിയിപ്പുകൾ ലഭിക്കുന്ന മുറക്ക്​ നിയന്ത്രണം തുടർന്നും ഏർപ്പെടുത്തുമെന്നും ഉത്തരവിൽ വ്യക്തമാക്കിയിട്ടുണ്ട്​. റോഡ്​ തകർന്നത്​ മൂലം ദേവികുളം താലൂക്കിലെ കുണ്ടള മുതൽ വട്ടവടവരെയും മൂന്നാർ ഗ്യാപ്​ റോഡ്​ ഭാഗത്തും പ്രാദേശികമായി ഏർപ്പെടുത്തിയ നിയന്ത്രണങ്ങളും തുടരും. അൽ അസ്ഹർ ഡെന്‍റൽ കോളജിൽ ബിരുദദാനം നാളെ തൊടുപുഴ: അൽ അസ്ഹർ ഡെന്‍റൽ കോളജിന്‍റെ ബിരുദദാന ചടങ്ങ് ശനിയാഴ്ച കോളജ് കാമ്പസിൽ നടക്കും. വൈകീട്ട്​ 4.30ന്​ ജലവിഭവ മന്ത്രി റോഷി അഗസ്റ്റിൻ ഉദ്​ഘാടനം ചെയ്യും. അൽ അസ്ഹർ ഗ്രൂപ് ഓഫ് ഇൻസ്​റ്റിറ്റ്യൂഷൻസ്​ ചെയർമാൻ കെ.എം. മൂസ അധ്യക്ഷത വഹിക്കും. കേരള എൽ.ബി.എസ് സെന്‍റർ ഫോർ സയൻസ് ആൻഡ്​​ ടെക്​നോളജി ഡയറക്ടർ ഡോ. എം. അബ്ദുൽറഹ്​മാൻ, കേന്ദ്ര ഇൻഫർമേഷൻ ആൻഡ് ബ്രോഡ്കാസ്റ്റിങ്​ ഡയറക്ടർ ഡോ. നീതു സോന എന്നിവർ മുഖ്യാതിഥികൾ ആയിരിക്കും. കേരള കോ​ൺഗ്രസ്​ സ്വാതന്ത്യ ജൂബിലി ജനസദസ്സ് തൊടുപുഴ: സ്വാതന്ത്ര്യത്തിന്‍റെ 75ാം വാർഷികത്തോടനുബന്ധിച്ച് കേരള കോൺഗ്രസ്​ ജില്ല കമ്മിറ്റി ജൂബിലി ജനസദസ്സ് സംഘടിപ്പിക്കും. 14ന്​ ഉച്ചക്ക്​ 2.30ന് തൊടുപുഴ മുനിസിപ്പൽ മൈതാനിയിൽ പാർട്ടി ചെയർമാൻ പി.ജെ. ജോസഫ് എം.എൽ.എ ഉദ്ഘാടനം ചെയ്യും. ജില്ല പ്രസിഡന്‍റ്​ പ്രഫ. എം.ജെ. ജേക്കബ് അധ്യക്ഷത വഹിക്കും. ഗാന്ധിയൻ ചിന്തകനും എം.ജി സർവകലാശാല മുൻ വൈസ്​ ചാൻസലറുമായ ഡോ. സിറിയക് തോമസ്​ ജൂബിലി സന്ദേശം നൽകും.