ആമ മുതൽ ഹെലികോപ്​ടർ വ​രെ ചിരട്ടയിൽ സജീഷി​ന്‍റെ കരവിരുത്​

പള്ളുരുത്തി: സജീഷ് വേണുഗോപാലി​ന്​ ചിരട്ട കിട്ടിയാൽ അത്​ സൈക്കിളും സ്കൂട്ടറും ഹെലികോപ്ടറും ആമയുമൊക്കെയായി മാറും. ദേവസ്വം ബോർഡ് ക്ഷേത്രത്തിലെ താൽക്കാലിക ജീവനക്കാരനായ സജീഷി​െൻറ കരവിരുതിൽ രൂപപ്പെടുന്നത്​ നിരവധി കൗതുകവസ്​തുക്കളാണ്​. ലോക്ഡൗൺ കാലത്ത് നേരമ്പോക്കിനാണ് ചിരട്ടകളിൽ പരീക്ഷണം തുടങ്ങിയത്.

ആദ്യ ലോക്ഡൗൺ സമയത്ത് ഭാര്യക്ക്​ ചിരട്ടയുടെ മോതിരം നിർമിച്ചുനൽകിയായിരുന്നു തുടക്കം. സുഹൃത്തുക്കളുടെയും നാട്ടുകാരുടെയും പ്രോത്സാഹനവും കൂടിയായപ്പേൾ പലരൂപത്തിലുള്ള വസ്​തുക്കൾ നിർമിക്കാൻ തുടങ്ങി. ബ്ലേഡ്​ ഉപയോഗിച്ച്​ ചിരട്ട പാകപ്പെടുത്തി ശേഷം തറയിൽ ഉരച്ചാണ് രൂപമാറ്റം വരുത്തുന്നത്​.

വേറെ ഉപകരണങ്ങളൊന്നും നിർമാണത്തിന് ഉപയോഗിക്കാറില്ല. ഫിനിഷ് വർക്കിൽ പോളിഷിനു പകരം നല്ലെണ്ണയാണ് ഉപയോഗിക്കുന്നത്. നിർമിക്കാൻ ഉദ്ദേശിക്കുന്ന രൂപങ്ങൾ പേപ്പറിൽ വെട്ടിയെടുക്കും. അതിനു ശേഷമാണ് ചിരട്ട രൂപപ്പെടുത്തുന്നത്.

ക്ഷേത്രങ്ങൾ അടച്ചതോടെ വരുമാനം നിലച്ച അവസ്ഥയിലാണ് ഈ 33കാരൻ. പള്ളുരുത്തി അഴകിയകാവ് ഭഗവതി ക്ഷേത്രത്തിൽ തകിലുവാദകനായി താൽക്കാലിക ജോലിയുണ്ടായിരുന്നു. ഈ തസ്തികയിലേക്ക് സ്ഥിരനിയമനം വന്നതോടെ അതും നഷ്​ടപ്പെട്ടു. അഴകിയകാവ് ക്ഷേത്രത്തിനു സമീപം വടക്കേ കളരിക്കൽ കുടുംബാംഗമാണ്. ക്ഷേത്രത്തിലെ തകിലു വാദ്യക്കാരനായിരുന്ന വേണുഗോപാലി​െൻറ മകനാണ് സജീഷ്. ഇപ്പോൾ തൃച്ചാറ്റുകുളം തളിയപറമ്പിനടുത്താണ് താമസം. അമ്മ സുലോചനയും ഭാര്യ രേഷ്മയും എല്ലാ പിന്തുണയുമായി ഒപ്പമുണ്ട്. നാലുവയസ്സുകാരൻ ആദിദേവ് മകനാണ്.