കളമശ്ശേരിയിൽ മണ്ണിടിച്ചിലിൽ ലോറി ഡ്രൈവർ മരിച്ചു

കളമശ്ശേരി: എറണാകുളം കളമശ്ശേരിയിൽ മണ്ണിടിച്ചിലിൽ ലോറി ഡ്രൈവർ മരിച്ചു. തിരുവനന്തപുരം ഉദയൻകുളങ്ങര സ്വദേശി തങ്കരാജ് ആണ് മരിച്ചത്.

ഞായറാഴ്ച രാവിലെ എട്ട് മണിയോടെ ദേശീയപാത അപ്പോളോ ടയേഴ്സിന് സമീപം ദേശീയപാതയിലാണ് സംഭവം. ലോറി നിർത്തി സമീപത്ത് മൂത്രമൊഴിക്കാൻ എത്തിയതായിരുന്നു തങ്കരാജ്. ഈ സമയം സമീപത്തെ മൺതിട്ട ഇടിഞ്ഞ് ശരീരത്തിലേക്ക് മണ്ണും വലിയ കല്ലും വീഴുകയായിരുന്നു.

ഉടൻ ഇവിടെയുണ്ടായിരുന്ന മറ്റു ലോറി ഡ്രൈവർമാരും നാട്ടുകാരും എത്തി തങ്കരാജിനെ പുറത്തെടുക്കുമ്പോഴേക്കും മരിച്ചിരുന്നു. മൃതദേഹം കളമശ്ശേരി മെഡിക്കൽ കോളേജ് ആശുപത്രിയിലേക്ക് മാറ്റി.