പറവൂരിൽ ഹോം ഗാർഡ് ഉൾപ്പെടെ രണ്ടുപേർക്ക് തെരുവുനായുടെ കടിയേറ്റു

പറവൂർ: തെരുവുനായുടെ കടിയേറ്റ് രണ്ടുപേർക്ക് പരിക്ക്. മുനിസിപ്പൽ കവലയിൽ ജോലി ചെയ്തിരുന്ന ഹോം ഗാർഡ് എം.ജെ. തോമസിനെ (51) അടക്കമാണ്​ തെരുവുനായ്​ കടിച്ചത്​. ചൊവ്വാഴ്ച രാവിലെ ആറോടെ കവലയിൽ ജോലിക്കെത്തി കടയുടെ സമീപം ഫോൺ ചെയ്തു നിൽക്കുമ്പോഴാണ് ഓടി വന്ന നായ്​ തോമസിനെ കടിച്ചത്. കാലിൽനിന്നും പിടിവിടാതിരുന്ന നായെ ഒരു വിധത്തിൽ കാൽ കുടഞ്ഞും ബഹളമുണ്ടാക്കിയുമാണ് ഓടിച്ചത്. തോമസിനെ കടിക്കുന്നതിന് മുമ്പ്​ കെ.എം.കെ കവലയിലെ പെട്രോൾ പമ്പിൽ വെച്ച് പെരുമ്പടന്ന ഗവ. എൽ.പി സ്കൂളിലെ അധ്യാപിക ഇന്ദുലേഖയുടെ (40) കാലിലും നായ്​ കടിച്ചു. പെട്രോൾ അടിക്കാൻ ഇരുചക്രവാഹനം പമ്പിൽ നിർത്തിയ സമയത്താണ് കടിയേറ്റത്. രണ്ടുപേരുടെയും കാലിൽ ആഴത്തിൽ മുറിവുണ്ടായി. ഇരുവരും താലൂക്ക് ആശുപത്രിയിൽ പ്രാഥമിക ശുശ്രൂഷ നടത്തിയശേഷം എറണാകുളം ജനറൽ ആശുപത്രിയിലെത്തി കുത്തിവെപ്പ്​ എടുത്തു. കുറച്ചു നാളുകളായി നഗരത്തിലും സമീപ പ്രദേശത്തും തെരുവുനായ് ശല്യവും ആക്രമണവും വർധിച്ചു വരികയാണ്. ഏതാനും ആഴ്ചകൾക്ക്​ മുമ്പ്​ നഗരത്തിലെ തോന്ന്യകാവിലും കുറച്ചുപേരെ തെരുവുനായ്​ ആക്രമിച്ചിരുന്നു. തെരുവുനായ്​ ശല്യത്തിൽനിന്ന്​ ജനങ്ങളെ രക്ഷിക്കാൻ നഗരസഭ അധികാരികൾ യാതൊരു നടപടിയും സ്വീകരിക്കുന്നില്ലെന്ന ആക്ഷേപം ശക്തമാണ്. നായ്​ കടിച്ച് മുറിവേറ്റാൽ എടുക്കേണ്ട കുത്തിവെപ്പിനുള്ള മരുന്നു താലൂക്ക് ആശുപത്രിയിൽ ലഭ്യമല്ലാത്തതും ജനങ്ങൾക്ക് ബുദ്ധിമുട്ടുണ്ടാക്കുന്നുണ്ട്. പടം EA PVR nagarathil home gaurd 7 തെരുവുനായുടെ കടിയേറ്റ ഹോം ഗാർഡ് എം.ജെ. തോമസിന് താലൂക്ക് ആശുപത്രിയിൽ പ്രാഥമിക ചികിത്സ നൽകുന്നു