പണിമുടക്ക്​ രണ്ടാം ദിനം: ജനജീവിതം സ്തംഭിച്ചു, കടകൾ തുറന്നു

കൊച്ചി: ജില്ലയിൽ വ്യാപകമായി വ്യാപാര സ്ഥാപനങ്ങൾ തുറന്നു പ്രവർത്തിച്ചെങ്കിലും പണിമുടക്കിന്‍റെ രണ്ടാം ദിനവും ജനജീവിതം സ്തംഭിച്ചു. പൊലീസ്​ സുരക്ഷയിൽ കെ.എസ്​.ആർ.ടി.സി ഏതാനും സർവിസും നടത്തി. കാർ, ഇരുചക്ര വാഹനങ്ങൾ കൂടുതലായി പൊതുനിരത്തിലിറങ്ങി. അന്തർ സംസ്ഥാന തൊഴിലാളികൾ പണിയെടുക്കുന്ന നിർമാണ സ്ഥലങ്ങളും എറണാകുളം നഗരത്തിൽ പ്രധാന വ്യാപാരകേന്ദ്രങ്ങളായ പെന്‍റ മേനക, ബ്രോഡ്​വേ എന്നിവിടങ്ങളിൽ സ്ഥാപനങ്ങൾ പ്രവർത്തിച്ചു. സംയുക്ത തൊഴിലാളി യൂനിയൻ സമരസമിതി പ്രകടനങ്ങളും സമ്മേളനങ്ങളും നടത്തി. കെ.എസ്​.ആർ.ടി.സി ജില്ലയിൽ ഏഴ്​ സർവിസാണ്​ നടത്തിയത്​. കലക്ടറേറ്റിലെ ജീവനക്കാരെ ലക്ഷ്യമിട്ട്​ കാക്കനാട്​, ഹൈകോടതി, തോപ്പുംപടി, കളമശ്ശേരി തുടങ്ങിയ സ്ഥലങ്ങളിലേക്കാണ്​ പ്രധാനമായും സർവിസുകൾ പോയത്​. ആദ്യ സർവിസുകൾക്ക്​ നഗരങ്ങളിൽ പൊലീസ്​ സുരക്ഷ ഏർപ്പെടുത്തിയിരുന്നു. യാത്രക്കാരുടെ എണ്ണം കണക്കാക്കിയാണ്​ സർവിസുകൾ പോയതെന്ന്​ ഡിപ്പോ അധികൃതർ അറിയിച്ചു. ജില്ലയിലെ പ്രധാന ഡിജിറ്റൽ ഹബ്ബായ പെന്‍റ മേനകയിൽ നൂറിനടുത്ത്​ കടകൾ തുറന്നു. 90 ശതമാനം സ്ഥാപനങ്ങളും തുറന്നതായി വ്യാപാരികൾ അറിയിച്ചു. ഇടപ്പള്ളി, പാലാരിവട്ടം, കലൂർ എന്നിവിടങ്ങളിൽ മൊബൈൽ ഷോപ്പുകൾ തുറന്നത്​ സമരാനുകൂലികൾ എത്തി അടപ്പിച്ചു. പിന്നീട്​ വീണ്ടും തുറന്നപ്പോൾ തൊഴിലാളി സംഘടന പ്രവർത്തകർ എത്തി അടക്കാൻ ആവശ്യപ്പെട്ടെങ്കിലും കടയടക്കാതെ ജീവനക്കാർ പുറത്തിറങ്ങി നിന്നു. ഇതോടെ പ്രവർത്തകർ പിന്മാറിയതോടെ സ്ഥാപനങ്ങൾ പ്രശ്നമില്ലാ​തെ പ്രവർത്തിച്ചു. ബ്രോഡ്​വേയിൽ രാവിലെ മുതൽ ഒറ്റപ്പെട്ട്​ സ്ഥാപനങ്ങൾ തുറന്നു. പ്രശ്നങ്ങൾ ഇല്ലാത്തതിനാൽ ഫുട്​വെയർ, ടെക്സ്​റ്റൈൽസ്​ കടകൾ ഉച്ചയോടെ കൂടുതലായി പ്രവർത്തിച്ചു. ഉച്ചവരെ ഉപഭോക്താക്കൾ കാര്യമായി വന്നില്ലെങ്കിലും വൈകീട്ടോടെ നഗരം സജീവമായി. സംയുക്ത തൊഴിലാളി യൂനിയൻ സമരസമിതി എറണാകുളം കലൂരിൽ നടത്തിയ സമര കൂട്ടായ്മ കെ.വി. മനോജ്​ ഉദ്​ഘാടനം ചെയ്തു. സക്കീർ ഹുസൈൻ അധ്യക്ഷത വഹിച്ചു. പി. രാജു, ടി.ബി. മിനി, ബാലകൃഷ്ണൻ, ഷാനിൽ ലീല ജോഷി, ബീന മഹേഷ്​, അമൽ, എലിസബത്ത്​ അസീസി എന്നിവർ സംസാരിച്ചു. പാലാരിവട്ടത്ത്​ നടന്ന സമര കൂട്ടായ്മ എ.ജി. ഉദയകുമാർ ഉദ്​ഘാടനം ചെയ്തു. പി.കെ. സുധീർ അധ്യക്ഷത വഹിച്ചു.