വടുതലയിൽ മോഷണം തുടരുന്നു; കോട്ടൂർ പള്ളിയിലെ ഭണ്ഡാരപ്പെട്ടി പൊളിച്ചു

വടുതല: ഒരാഴ്ചക്കിടെ വടുതല മേഖലയിൽ മോഷണം വ്യാപകം. ദേവാലയങ്ങൾ കേന്ദ്രീകരിച്ചാണ്​ അധികവും. കഴിഞ്ഞ രാത്രി കോട്ടൂർ പള്ളിയിലെ ഭണ്ഡാരപ്പെട്ടി തകർക്കാൻ ശ്രമമുണ്ടായി. സമീപത്തെ ആക്രിക്കടയിൽ അന്നുതന്നെ ചില്ലറക്കാശ്​ വെച്ച പെട്ടി മോഷണംപോയി. പനക്കത്തറ അൻസാർ മസ്ജിദിലെ ഭണ്ഡാരപ്പെട്ടിയും കുത്തിത്തുറന്നു. തലേന്ന്​ രാത്രിയാണ് അരൂക്കുറ്റി പാദുവാപുരം സെന്‍റ് ​ആന്‍റണീസ് ഇടവക പള്ളിക്ക്​ കീഴിലെ വടുതല ജെട്ടി സെന്‍റ്​ ജേക്കബ് ചാപ്പലിലെ സക്രാരി തുറന്ന് തിരുവോസ്തിയും കാണിക്കവഞ്ചിയും കൊണ്ടുപോയത്​. വടുതല ജെട്ടി മസ്ജിദിലെയും എസ്.എൻ.ഡി.പി 602 നമ്പർ ശാഖയുടെ ക്ഷേത്രത്തിലെയും ഭണ്ഡാരപ്പെട്ടിയും ഈ ദിവസങ്ങളിൽ കവർന്നു. ചേർത്തല ഡിവൈ.എസ്.പി ടി.ബി. വിജയ‍ൻെറ നേതൃത്വത്തിൽ ക്രൈംബ്രാഞ്ച് ഡിവൈ.എസ്.പിയും വിരലടയാളവിദഗ്​ധരും എത്തി വിശദ അന്വേഷണം നടത്തുമെന്ന് പ്രഖ്യാപിച്ച അന്ന് രാത്രിതന്നെയാണ് ഈ മോഷണങ്ങളെല്ലാം നടന്നത്. വടുതല ജമാഅത്ത് ഇംഗ്ലീഷ് മീഡിയം സ്കൂളിലും ഒരാഴ്ചക്കിടെ മോഷണശ്രമം നടന്നു. കിടേശ്ശേരി ക്ഷേത്രം, മൂലങ്കുഴി ക്ഷേത്രം, കാട്ടില മഠം ക്ഷേത്രം, അരൂക്കുറ്റി ശ്രീസുബ്രഹ്മണ്യ ക്ഷേത്രം തുടങ്ങിയിടങ്ങളിലെ കാണിക്കവഞ്ചികളിലും മോഷണമുണ്ടായി. പൊലീസ്​ പട്രോളിങ്​ കാര്യക്ഷമമല്ലാത്തതാണ്​ വ്യാപക മോഷണങ്ങൾക്ക് കാരണമെന്ന് ആക്ഷേപമുണ്ട്​. രാത്രി സജീവമാകുന്ന കഞ്ചാവ്-മയക്കുമരുന്ന് മാഫിയകളെ ശക്തമായി നിരീക്ഷിക്കാനുള്ള സംവിധാനമൊരുക്കണമെന്നും നാട്ടുകാർ ആവശ്യപ്പെടുന്നു. അരൂക്കുറ്റിയിലെ പൊലീസ് എയ്​ഡ്പോസ്റ്റ് പ്രവർത്തന സജ്ജമാക്കണമെന്ന് യൂത്ത് കോൺഗ്രസ് അരൂർ നിയോജക മണ്ഡലം പ്രസിഡന്റ് എം.എസ്. നിധീഷ് ബാബു ആവശ്യപ്പെട്ടു. ആരാധനാലയങ്ങൾ കേന്ദ്രീകരിച്ചുള്ള തുടർച്ചയായ മോഷണങ്ങളിൽ അധികാരികൾ ജാഗ്രത പുലർത്തണമെന്ന്​ വെൽഫെയർ പാർട്ടി അരൂക്കുറ്റി പഞ്ചായത്ത് കമ്മിറ്റി ആവശ്യപ്പെട്ടു. പ്രസിഡന്‍റ്​ എം.എ. അലിയാർ അധ്യക്ഷത വഹിച്ചു. ചിത്രം : കോട്ടൂർ പള്ളിയിലെ ഭണ്ഡാരപ്പെട്ടി പൊളിച്ചനിലയിൽ